हिंगोली - जिल्ह्यात दिवसेंदिवस अपघाताच्या मालिका सुरूच आहे. पुन्हा एकदा कळमनुरी ते वारंगा मसाई मार्गे जाणाऱ्या रस्त्यावरील पुलावरून दुचाकी पुलावरून खाली कोसळून एक जण जागीच ठार तर दोघे जण गंभीर जखमी झाले आहेत. जखमींवर मनुरीच्या उपजिल्हा रुग्णालयात उपचार सुरु आहे.
ऋतिक वाघमारे (वय १७) मृत तरुणाचे नाव आहे. तर, वैभव बोरकर आणि सुरज दळवे दोघे गंभीर जखमी झाले आहेत. पोलिसांनी दिलेल्या माहितीनुसार, हे तिघे जण कळमनुरी तालुक्यातील नांदापूरमधील यात्रेवरून रात्री साडेसात वाजण्याच्या सुमारास दुचाकी वरून हिंगोलीकडे निघाले होते. वारंगा मसाई मार्गावरावरुन जाताना व्यवस्थीत रस्ता न दिसल्याने, दुचाकी पुलावरून जोरात खाली कोसळली. जमिनीवर जोराने आदळल्याने ऋतिकचा जागीच मृत्यू झाला. तर वैभव अन सूरज दोघे जण दूर फेकले गेले. दरम्यान, काही वाहन चालकांनी या घटनेची माहिती कळमनुरी पोलिसांना दिली. घटनेची माहिती मिळताच पोलिसांनी घटनास्थळी धाव घेत जखमींना कळमनुरी येथील उपजिल्हा रुग्णालयात उपचारासाठी हलविले. तर मृताचाही पंचनामा करून मृतदेह शवविच्छेदनासाठी उपजिल्हारुग्णालयात पाठविला.