लंडन - अफगाणिस्तानमधील गंभीर परिस्थिती पाहता राशिद खान आणि मोहम्मद नबी आयपीएलच्या उर्वरित हंगामात खेळणार का? हा प्रश्न निर्माण झाला आहे. तालिबानी दहशतवाद्यांनी अफगाणिस्तानचा ताबा घेतला असून देशातील परिस्थितीचा या खेळाडूंच्या सहभागावर परिणाम होण्याची शक्यता आहे. अशात त्यांचा आयपीएल संघ असलेल्या सनरायझर्स हैदराबादने याबाबत स्पष्टीकरण दिले आहे.
सनरायझर्स हैदराबाद संघाचे सीईओ के. शानमुगम यांनी एएनआयला सांगितलं की, 'आम्ही आयपीएलमधील सहभाग विषयावर राशिद आणि नबी यांच्याशी अद्याप चर्चा केलेली नाही. परंतु ते दोघेही आयपीएल स्पर्धेच्या उर्वरित हंगामात खेळतील. आमचा संघ 31 ऑगस्ट रोजी यूएईला रवाना होणार आहे.'
राशिद खान आणि मोहम्मद नबी हे दोघेही सध्या इंग्लंडमध्ये 'द हंड्रेड' ही क्रिकेट स्पर्धा खेळत आहे. ही स्पर्धा 21 ऑगस्ट रोजी संपणार आहे. स्पर्धा संपल्यानंतर राशिद आणि नबी घरी परतणार की इंग्लंडमध्येच थांबतील याकडे सर्वांचे लक्ष लागले आहे.