തിരുവനന്തപുരം:പാറശ്ശാല സ്വദേശി ഷാരോൺ രാജിന്‍റെ ദുരൂഹ മരണത്തിൽ ജില്ല ക്രൈംബ്രാഞ്ച് ഡിവൈഎസ്‌പി ജോൺസന്‍റെ നേതൃത്വത്തിൽ രൂപം നൽകിയ പ്രത്യേക അന്വേഷണസംഘം ഇന്ന് (ഒക്‌ടോബർ 30) അന്വേഷണം ആരംഭിക്കും. ഷാരോൺ രാജിന് ജ്യൂസും കഷായവും നൽകിയ വനിത സുഹൃത്തിനെയും കുടുംബത്തെയും അന്വേഷണസംഘം മൊഴിയെടുക്കാൻ വിളിപ്പിച്ചു.
പെണ്‍കുട്ടിയോട് രാവിലെ പത്ത് മണിയോടെ റൂറല്‍ എസ്‌പി ഡി ശിൽപയുടെ ഓഫിസിലേക്കെത്താന്‍ നിര്‍ദേശം നല്‍കിയിട്ടുണ്ട്. ഇന്ന് വിശദമായി തന്നെ മൊഴി രേഖപ്പെടുത്താനാണ് ക്രൈംബ്രാഞ്ചിന്‍റെ നീക്കം. ഷാരോണിന്‍റെ മരണവുമായി ബന്ധപ്പെട്ട് എല്ലാ ആരോപണങ്ങളും പരിശോധിക്കും. ഇന്നലെ (ഒക്‌ടോബർ 29) പെൺകുട്ടിയുടെ വീട്ടിലെത്തി പെൺകുട്ടിയുടെ മൊഴി രേഖപ്പെടുത്താൻ ശ്രമിച്ചിരുന്നെങ്കിലും ദേഹാസ്വാസ്ഥ്യം അനുഭവപ്പെട്ടതിനെ തുടർന്ന് സാധിച്ചിരുന്നില്ല.