തിരുവനന്തപുരം: അനിത പുല്ലയിൽ ലോക കേരള സഭ നടക്കുന്ന നിയമസഭ സമുച്ചയത്തിൽ കയറിയ സംഭവത്തിൽ അന്വേഷണം നടത്തുമെന്ന് റവന്യു മന്ത്രി കെ രാജൻ. വിഷയത്തെക്കുറിച്ച് സ്‌പീക്കറുമായി സംസാരിച്ചിട്ടുണ്ട്. അനിതയുടെ സന്ദർശനം ഗുണകരമായ കാര്യമല്ലെന്നും മന്ത്രി പറഞ്ഞു.
അതേസമയം അനിത എങ്ങനെയാണ് നിയമസഭ മന്ദിരത്തിലെത്തിയതെന്ന് സഭ സെക്രട്ടേറിയറ്റ് അന്വേഷിക്കാനിരിക്കുകയാണ്. അനിതയ്ക്ക് നിയസഭ ജീവനക്കാരുടെ സഹായം ലഭിച്ചോ എന്നുള്‍പ്പെടെ അന്വേഷിക്കാന്‍ സ്‌പീക്കര്‍ എം ബി രാജേഷ് നിര്‍ദേശിച്ചു. എന്നാൽ ലോക കേരള സഭയിലേക്ക് അനിത പുല്ലയില്‍ എത്തിയതുമായി ബന്ധപ്പെട്ട് അന്വേഷണത്തിനില്ലെന്നാണ് നോർക്കയുടെ പ്രതികരണം.