തിരുവനന്തപുരം: പാർട്ടി ഏൽപ്പിച്ച ഉത്തരവാദിത്വം കൂടുതല്‍ കരുത്തോടെ നിർവഹിക്കുമെന്ന് സിപിഎം ജില്ല സെക്രട്ടറി വി ജോയ്. മുൻകാലങ്ങളിൽ നടത്തിയ സത്യസന്ധമായ സംഘടന പ്രവർത്തനം കണക്കാക്കിയാണ് പാർട്ടി ഇത്തരമൊരു ഉത്തരവാദിത്വം ഏൽപ്പിച്ചിരിക്കുന്നതെന്നും അദ്ദേഹം വ്യക്തമാക്കി. അതേസമയം തിരുവനന്തപുരത്തെ സിപിഎമ്മിൽ പ്രശ്‌നങ്ങളില്ലെന്ന് പുതിയ ജില്ല സെക്രട്ടറി പറഞ്ഞു.
ഒന്നോ രണ്ടോ സംഭവങ്ങൾ ഉയർത്തി കാട്ടിയുള്ള പ്രചരണമാണ് നടക്കുന്നതെന്നും അതുകൊണ്ട് പാർട്ടിക്ക് ഒന്നും സംഭവിക്കില്ലെന്നും അദ്ദേഹം മാധ്യമങ്ങളോട് പ്രതികരിച്ചു. എല്ലാ സംഘടനകളിലും ഉള്ളതുപോലെ സിപിഎമ്മിലും ചില പുഴുക്കുത്തുകളുണ്ട്. അത് പരിഹരിച്ച് മുന്നോട്ടുപോകും.
വിദ്യാർഥി, യുവജന സംഘടനകളിൽ പ്രവർത്തിക്കുന്നത് വിവിധ മേഖലകളിൽ നിന്നുള്ളവരാണ്. അവർക്ക് വീഴ്‌ച വരാം. അത് തിരുത്തി മുന്നോട്ടു പോകുമെന്ന് വിദ്യാര്‍ഥി, യുവജന നേതാക്കളിലെ ലഹരി ഉപയോഗത്തെ കുറിച്ചുള്ള ചോദ്യത്തിന് വി ജോയ് പ്രതികരിച്ചു.