പത്തനംതിട്ട: ജില്ലയിൽ 45 വയസിന് മുകളിലുള്ളവരുടെ കൊവിഡ് വാക്‌സിനേഷൻ നാളെ പുനരാംരംഭിക്കുമെന്ന് ജില്ലാ മെഡിക്കല്‍ ഓഫീസര്‍ ഡോ.എ.എല്‍ ഷീജ അറിയിച്ചു. രണ്ടാം ഡോസ് വാക്‌സിൻ സ്വീകരിക്കുന്നതിനുള്ള സമയ പരിധി 84 ദിവസമാണ്. അതിനാൽ ആദ്യ ഡോസ് വാക്‌സിൻ വിതരണം ആരംഭിക്കാൻ അധികൃതർ തീരുമാനിക്കുകയായിരുന്നു.
ആകെ 20000 ഡോസ് വാക്‌സിനാണ് ജില്ലയിൽ വിതരണത്തിനായി എത്തിച്ചിരിക്കുന്നത്. അതിൽ 11,000 ഡോസ് കോവിഷീല്‍ഡും ബാക്കി കൊവാക്‌സിനുമാണ്. കോവിഷീല്‍ഡ് വാക്സിന് ഓണ്‍ലൈൻ രജിസ്ട്രേഷൻ ഉണ്ടായിരിക്കുന്നതല്ല. ആശാപ്രവര്‍ത്തകര്‍ മുന്‍കൂട്ടി അറിയിക്കുന്നതിന് അനുസരിച്ച് ടോക്കണ്‍ എടുത്ത് വാക്‌സിൻ സ്വീകരിക്കാം. ഒരു ദിവസം 100 പേര്‍ക്ക് വീതമാണ് വാക്‌സിൻ കുത്തിവെയ്‌പ്പ് നൽകുക.