പാലക്കാട്: ട്രെയിനില്‍ കടത്തിയ 12 കിലോ കഞ്ചാവുമായി യുവാവ് പിടിയില്‍. തൃശൂര്‍ പെരുമ്പിലാവ് കരിക്കാട് പൂളന്തറയ്‌ക്കല്‍ വീട്ടില്‍ ഹസ്സന്‍(32) ആണ് പിടിയിലായത്. സംസ്ഥാന വ്യാപകമായി നടക്കുന്ന നര്‍കോട്ടിക് ഡ്രൈവിന്റെ ഭാഗമായി പാലക്കാട് ടൗണ്‍ നോര്‍ത്ത് പൊലീസും ജില്ല ലഹരിവിരുദ്ധ സ്‌ക്വാഡും നടത്തിയ പരിശോധനയിലാണ് ഇയാള്‍ പിടിയിലായത്.
ട്രെയിനില്‍ ആന്ധ്രയില്‍ നിന്നും എത്തിച്ച കഞ്ചാവുമായി ബസില്‍ തൃശൂര്‍ ഭാഗത്തേക്ക് പോകാന്‍ ശ്രമിക്കുന്നതിനിടെ വൈകിട്ട് ആറ് മണിയോടെ ഒലവക്കോട് റെയില്‍വേ സ്‌റ്റേഷന്‍ പരിസരത്തു നിന്നാണ് ഇയാളെ പിടികൂടിയത്. കിലോയ്ക്ക് നാലായിരം രൂപ നല്‍കിയാണ് ആന്ധ്രയില്‍ നിന്നും കഞ്ചാവ് വാങ്ങുന്നത്. അത് നാട്ടിലെത്തിച്ചാല്‍ കിലോ 20,000 രൂപയ്‌ക്ക്‌ വില്‍ക്കും.