കെ മുരളീധരന്‍ പ്രതികരിക്കുന്നു
കോട്ടയം: അനിൽ ആന്‍റണിക്ക് സംഘി മനസുള്ളതായി തോന്നിയിട്ടില്ലെന്ന് കെ മുരളീധരൻ എംപി. ഏതെങ്കിലും നേതാക്കന്മാരോടുള്ള വിയോജിപ്പ് കൊണ്ടെടുത്ത തീരുമാനമാണെങ്കിൽ തിരുത്തണമെന്നും മുരളീധരൻ ആവശ്യപ്പെട്ടു. ഒരു പുരുഷായുസ് മുഴുവൻ പ്രസ്ഥാനത്തിനു വേണ്ടി ഉഴിഞ്ഞുവച്ച ആളാണ് എ കെ ആന്‍റണി, അദ്ദേഹത്തെ വേദനിപ്പിക്കുന്ന തീരുമാനം അനിൽ ആന്‍റണി എടുക്കില്ലെന്നാണ് തന്‍റെ വിശ്വാസമെന്നും അദ്ദേഹം പറഞ്ഞു.
'ഗുജറാത്ത് കലാപത്തിൽ ഒന്നാം പ്രതി നരേന്ദ്ര മോദിയും രണ്ടാം പ്രതി അമിത്‌ ഷായുമാണെന്ന് കോണ്‍ഗ്രസ് ഇന്നും വിശ്വസിക്കുന്നു. ബിബിസി ഡോക്യുമെന്‍ററി സത്യമാണ്', മുരളീധരന്‍ വ്യക്തമാക്കി. കേരളത്തിലെ സിപിഎമ്മിന്‍റെ നിലപാട് ബിജെപിയെ പ്രൊമോട്ട് ചെയ്യുക എന്ന രീതിയാണ്. പരസ്യമായി മോദിയെ വിമർശിക്കുകയും രഹസ്യമായി മോദിയെ സഹായിക്കുകയും ചെയ്യുന്ന പ്രവണതയാണ് പിണറായിക്കുള്ളത്.