കൊല്ലം:ശക്തികുളങ്ങര വെൻകുളങ്ങര സ്‌കൂളിന് സമീപത്തെ ക്ഷേത്രത്തിൽ മോഷണം. കുളക്കുടി ഭദ്രാദേവി ക്ഷേത്രത്തിലാണ് സംഭവം. ക്ഷേത്ര ശ്രീകോവിലിന് മുന്നിൽ സ്ഥാപിച്ചിരുന്ന ഏകദേശം ഒരു ലക്ഷം രൂപ വിലമതിക്കുന്ന ആമവിളക്കാണ് മോഷണം പോയത്.
ക്ഷേത്രത്തിന് സമീപം താമസിക്കുന്ന ഭക്തൻ ക്ഷേത്രത്തിലേക്ക് സംഭാവന നൽകിയ അഞ്ചടി ഉയരമുള്ള അഞ്ച് തട്ടുകളുള്ള വിളക്കാണ് നഷ്‌ടപ്പെട്ടത്. ക്ഷേത്ര ജീവനക്കാരൻ ക്ഷേത്രം തുറക്കാൻ എത്തിയപ്പോഴാണ് വിളക്ക് മോഷണം പോയത് ശ്രദ്ധയിൽപ്പെടുന്നത്. ശേഷം ക്ഷേത്രഭാരവാഹികളെ ജീവനക്കാരൻ മോഷണ വിവരം അറിയിക്കുകയായിരുന്നു.
പൊലീസിൽ വിവരം അറിയിച്ചതിനെ തുടർന്ന് എസ്.ഐ ആശയുടെ നേതൃത്വത്തിലുള്ള സംഘം സ്ഥലത്തെത്തി വിവരങ്ങൾ ശേഖരിച്ചു. ക്ഷേത്ര പരിസരം കേന്ദ്രീകരിച്ച് സാമൂഹ്യ വിരുദ്ധരുടെ ശല്യം രൂക്ഷമാണെന്ന് പരിസരവാസികൾ പറഞ്ഞു. രാത്രികാലങ്ങളിൽ ബൈക്കുകളിൽ ചെറുപ്പക്കാർ ഇവിടെ തമ്പടിക്കാറുണ്ടെന്നും നാട്ടുകാർ പറഞ്ഞു.