എറണാകുളം :സ്ത്രീകൾക്കും കുട്ടികൾക്കുമെതിരായ ലൈംഗികാതിക്രമ കേസുകൾ റദ്ദാക്കുന്നത് സംബന്ധിച്ച് സുപ്രധാന നിരീക്ഷണങ്ങളുമായി ഹൈക്കോടതി.
ഒത്തുതീർപ്പിന്‍റെ അടിസ്ഥാനത്തിൽ കേസ് റദ്ദാക്കുന്നത് സംബന്ധിച്ച് പൊതുമാനദണ്ഡം സാധ്യമല്ല. കേസിന്‍റെ വസ്‌തുതകൾ പരിഗണിച്ച് തീരുമാനമെടുക്കാമെന്നും കോടതി ചൂണ്ടിക്കാട്ടി.
സ്ത്രീകൾക്കും കുട്ടികൾക്കുമെതിരായ ലൈംഗികാതിക്രമങ്ങൾ സംബന്ധിച്ച കേസുകൾ റദ്ദാക്കുന്നതിലാണ്, ജസ്റ്റിസ് കൗസർ എടപ്പഗത്തിന്‍റെ നിരീക്ഷണം. ഒത്തുതീർപ്പിന്‍റെ അടിസ്ഥാനത്തിൽ ഇത്തരം കേസുകൾ റദ്ദാക്കപ്പെടുമ്പോൾ, ചില ഘടകങ്ങൾ പരിശോധിക്കപ്പെടണമെന്നും ഹൈക്കോടതി വ്യക്തമാക്കി.
കേസിന്‍റെ സ്വഭാവം, കുറ്റകൃത്യം സമൂഹത്തിലുണ്ടാക്കുന്ന സ്വാധീനം ഇരയ്‌ക്കേറ്റ പരിക്കിന്‍റെ രീതി, എന്നിവ പരിഗണിക്കണം. ഇര ഒത്തുതീർപ്പില്‍ എത്തിയെന്നതിന്‍റെ യാഥാർഥ്യം എന്നിവയും പരിശോധിക്കേണ്ടതുണ്ട്.
എന്നാൽ, കുറ്റകൃത്യം അതിക്രൂരമാണെങ്കിൽ ഒത്തുതീർപ്പിന്‍റെ പേരിൽ കേസ് റദ്ദാക്കാനാവില്ലെന്നും കോടതി വ്യക്തമാക്കി.
'ഇരയുടെ ക്ഷേമം കണക്കിലെടുക്കണം':കേസ് റദ്ദാക്കലുമായി ബന്ധപ്പെട്ട ഒരു കൂട്ടം ഹർജികളിലാണ് കോടതി നിരീക്ഷണം. എന്നാൽ, ഇത്തരം കേസുകൾ റദ്ദാക്കപ്പെടുന്നതിനെ സർക്കാർ തുറന്ന് എതിർക്കുകയും ചെയ്‌തു. സ്ത്രീകൾക്കും കുട്ടികൾക്കുമെതിരായ ലൈംഗികാതിക്രമങ്ങൾ സംബന്ധിച്ച കേസുകൾ ഒത്തുതീർപ്പിന്‍റെ അടിസ്ഥാനത്തിൽ റദ്ദാക്കാനാവില്ല. ഒത്തുതീർപ്പ് വ്യവസ്ഥയിൽ കേസ് തന്നെ റദ്ദാക്കപ്പെടുന്നത് കുറ്റകൃത്യം നിയപരമാക്കുന്നതായി വ്യാഖ്യാനിക്കപ്പെടുമെന്നും സർക്കാർ വാദിച്ചു. എന്നാൽ ഇരയുടെ ക്ഷേമം കൂടി കണക്കിലെടുക്കേണ്ടതുണ്ടെന്നും കോടതി വ്യക്തമാക്കി.
ഇക്കാര്യത്തിൽ പൊതുമാനദണ്ഡം സാധ്യമാകില്ലെങ്കിലും ഓരോ കേസിന്‍റേയും വസ്‌തുതകൾ പരിശോധിച്ച് തീരുമാനമെടുക്കാമെന്നാണ് ഹൈക്കോടതിയെടുത്ത നിലപാട്. വിവാഹ വാഗ്‌ദാനം നൽകി പീഡിപ്പിച്ച കേസുകളിൽ പിന്നീട് ഇരയും കുറ്റാരോപിതനും തമ്മിൽ വിവാഹം കഴിഞ്ഞാൽ കേസ് നടപടികൾ അവരുടെ കുടുംബ ജീവിതത്തെ ബാധിക്കില്ലേയെന്നും കോടതി നിരീക്ഷിച്ചു.