ദോഹ: ഖത്തര്‍ ലോകകപ്പിലെ ഏറ്റവും മികച്ച ഗോളിനുള്ള പുരസ്‌കാരം പ്രഖ്യാപിച്ച് ഫിഫ. ബ്രസീല്‍ താരം റിച്ചാര്‍ലിസണ്‍ നേടിയ ഗോളാണ് ടൂര്‍ണമെന്‍റിലെ ഏറ്റവും മികച്ചതായി തെരഞ്ഞെടുക്കപ്പെട്ടത്. വോട്ടെടുപ്പിലൂടെയാണ് പുരസ്‌കാര ജേതാവിനെ കണ്ടെത്തിയത്.
നെയ്‌മര്‍, കിലിയന്‍ എംബാപ്പെ, എൻസോ ഫെർണാണ്ടസ്, തുടങ്ങിയ താരങ്ങളുടെ ഗോളുകളെ പിന്തള്ളിയാണ് റിച്ചാലിസണ്‍ പുരസ്‌കാര ജേതാവായത്. കൊറിയയ്‌ക്ക് എതിരെയുള്ള റിച്ചാലിസണിന്‍റെ മറ്റൊരു ഗോളിനും നോമിനേഷന്‍ ലഭിച്ചിരുന്നു.
ഗ്രൂപ്പ് ഘട്ടത്തില്‍ സെര്‍ബിയയ്‌ക്കെതിരായ മത്സരത്തിലാണ് റിച്ചാര്‍ലിസണിന്‍റെ തകര്‍പ്പന്‍ ഗോള്‍ പിറന്നത്. മത്സരത്തിന്‍റെ 73-ാം മിനിട്ടിലായിരുന്നു ഗോളിന്‍റെ പിറവി. വിനീഷ്യസിന്‍റെ പാസില്‍ നിന്നും അതിമനോഹരമായ ബൈസിക്കിള്‍ കിക്കിലൂടെയാണ് 25കാരനായ താരം പന്ത് വലയിലെത്തിച്ചത്.