മാഡ്രിഡ്:സ്‌പാനിഷ് ലാ ലിഗയില്‍ (La Liga) വിജയക്കുതിപ്പ് തുടര്‍ന്ന് റയല്‍ മാഡ്രിഡ് (Real Madrid). സാന്‍റിയാഗോ ബെര്‍ണാബ്യുവില്‍ (Santiago Bernabeu) ഇറങ്ങിയ മത്സരത്തില്‍ റയല്‍ സോസിഡാഡിനെയാണ് (Real Sociedad) റയല്‍ പരാജയപ്പെടുത്തിയത്. ഒന്നിനെതിരെ രണ്ട് ഗോളുകള്‍ക്കാണ് മത്സരത്തില്‍ റയലിന്‍റെ ജയം (Real Madrid vs Real Sociedad Match Result).
ഫെഡറിക്കോ വാല്‍വെര്‍ഡെ (Federico Valverde), ജൊസേലു (Joselu) എന്നിവരാണ് മത്സരത്തില്‍ റയലിന്‍റെ സ്‌കോറര്‍മാര്‍. റയല്‍ സോസിഡാഡിനായി ആൻഡർ ബാരെനെറ്റ്‌ക്‌സിയ (Ander Barrenetxea) ആയിരുന്നു ഗോള്‍ നേടിയത്. ഒരു ഗോളിന് പിന്നിട്ട് നിന്ന ശേഷമായിരുന്നു റയല്‍ രണ്ട് ഗോള്‍ തിരിച്ചടിച്ച് ജയം പിടിച്ചത്.
സീസണില്‍ റയല്‍ മാഡ്രിഡിന്‍റെ തുടര്‍ച്ചയായ അഞ്ചാം ജയമാണിത് (Real Madrid Winning Streak in La Liga 2023-24). തോല്‍വി അറിയാതെ കുതിപ്പ് തുടരുന്ന ടീം നിലവില്‍ പോയിന്‍റ് പട്ടികയിലെ ഒന്നാം സ്ഥാനക്കരാണ് (La Liga Points Table). ബാഴ്‌സലോണയാണ് (Barcelona) റയലിന് പിന്നില്‍ 13 പോയിന്‍റുമായി പോയിന്‍റ് പട്ടികയില്‍ രണ്ടാം സ്ഥാനത്ത്.
സാന്‍റിയാഗോ ബെര്‍ണാബ്യൂവില്‍ ആതിഥോയരുടെ മുന്നേറ്റമാണ് ആദ്യം കണ്ടത്. എന്നാല്‍, ആദ്യ ഗോള്‍ നേടിയതാകട്ടെ റയല്‍ സോസിഡാഡുമായിരുന്നു. അഞ്ചാം മിനിട്ടിലായിരുന്നു സന്ദര്‍ശകര്‍ ലീഡ് പിടിച്ചത്.