ദോഹ :എഎഫ്‌സി ഏഷ്യന്‍ കപ്പ് (AFC Asian Cup) ഫുട്‌ബോളിലെ ആദ്യ മത്സരത്തിനായി ഇന്ത്യ ഇന്ന് ഇറങ്ങും. കരുത്തരായ ഓസ്‌ട്രേലിയ ആണ് സുനില്‍ ഛേത്രിയുടെയും സംഘത്തിന്‍റെയും എതിരാളി. അല്‍ റയാന്‍ സ്റ്റേഡിയത്തില്‍ ഇന്ത്യന്‍ സമയം വൈകുന്നേരം അഞ്ച് മണിക്കാണ് മത്സരം തുടങ്ങുന്നത് (Asian Cup India vs Australia).
ലോക റാങ്കിങ്ങിലെ 25-ാം സ്ഥാനക്കാരാണ് ഓസ്‌ട്രേലിയ (Australia Fifa Ranking). ഇന്ത്യയാകട്ടെ 102-ാം സ്ഥാനത്തും (India Fifa Ranking). റാങ്കിങ്ങും ചരിത്രവും പരിശോധിച്ചാല്‍ ഇന്ന് ജയം നേടുക എന്നത് ഇന്ത്യയ്‌ക്ക് ഏറെ കടുപ്പമേറിയ പണിയാകും.
ബി ഗ്രൂപ്പില്‍ തന്നെ റാങ്കിങ്ങില്‍ പിന്നിലുള്ള ടീമാണ് ഇന്ത്യ. ഉസ്‌ബെകിസ്ഥാന്‍ (68), സിറിയ (92) എന്നിവരാണ് ഗ്രൂപ്പിലെ മറ്റ് ടീമുകള്‍. ടൂര്‍ണമെന്‍റില്‍ ആദ്യ രണ്ട് സ്ഥാനക്കാര്‍ നോക്ക് ഔട്ടിലേക്ക് നേരിട്ട് യോഗ്യത നേടുകയും മൂന്നാം സ്ഥാനക്കാര്‍ക്ക് മറ്റൊരു അവസരം ലഭിക്കുകയും ചെയ്യുന്ന സാഹചര്യത്തില്‍ ഇന്ന് ജയത്തിലുപരി സമനിലയെങ്കിലും നേടുക എന്ന ലക്ഷ്യമായിരിക്കും ഇന്ത്യയ്‌ക്ക് ഉണ്ടാകുക.
ജയം ആണെങ്കിലും തോല്‍വി ആണെങ്കിലും ടൂര്‍ണമെന്‍റില്‍ മികച്ച പ്രകടനം നടത്തുക എന്നതാണ് തങ്ങളുടെ ലക്ഷ്യമെന്ന് ഇന്ത്യന്‍ പരിശീലകന്‍ ഇഗോര്‍ സ്റ്റിമാക് അഭിപ്രായപ്പെട്ടിരുന്നു. ഒരു ടീമായും ഫുട്‌ബോളില്‍ ഒരു രാജ്യമായും വളരുക. ഈ ടൂര്‍ണമെന്‍റില്‍ നിന്നും പഠിക്കുന്ന കാര്യങ്ങള്‍ ഭാവിയില്‍ പ്രയോജനപ്പെടുത്തുകയാണ് ലക്ഷ്യമെന്നും അദ്ദേഹം വ്യക്തമാക്കിയിരുന്നു.