ഫത്തോർഡ : ഇന്ത്യൻ സൂപ്പർ ലീഗിലെ(ISL) വാശിയേറിയ പോരാട്ടത്തിൽ നോർത്ത് ഈസ്റ്റ് യുണൈറ്റഡിനെ കീഴടക്കി എടികെ മോഹൻ ബഗാൻ. രണ്ടിനെതിരെ മൂന്ന് ഗോളുകൾക്കാണ് ബഗാന്‍റെ വിജയം. ഇരട്ട ഗോൾ നേടിയ ഹ്യൂഗോ ബൗമസാണ് വിജയ ശില്‍പ്പി. ലിസ്റ്റണ്‍ കൊളാസോയും ഗോൾ നേടി.
അത്യന്തം ആവേശം നിറഞ്ഞ മത്സരത്തിൽ പുതിയ പരിശീലകന്‍ യുവാന്‍ ഫെറാന്‍ഡോയുടെ കീഴില്‍ കളിക്കാനിറങ്ങിയ മോഹന്‍ ബഗാനെ ഞെട്ടിച്ചുകൊണ്ട് നോർത്ത് ഈസ്റ്റാണ് ആദ്യ ഗോൾ നേടിയത്. മത്സരത്തിന്‍റെ രണ്ടാം മിനിട്ടിൽ ഹെഡറിലൂടെ മലയാളി താരം വി.പി സുഹൈറാണ് വല കുലുക്കിയത്.
ഇതോടെ മറുപടി ഗോളിനായി പൊരുതിയ ബഗാൻ ആദ്യ പകുതിക്ക് തൊട്ടുമുന്‍പ് ലക്ഷ്യം കണ്ടു. മത്സരത്തിന്‍റെ 45-ാം മിനിട്ടിൽ ലിസ്റ്റണ്‍ കൊളാസോയാണ് ഗോൾ നേടിയത്. നോർത്ത് ഈസ്റ്റിന്‍റെ മലയാളി ഗോൾ കീപ്പർ ലിസ്റ്റണ്‍ മോഹന്‍റെ പിഴവാണ് ഗോളായി കലാശിച്ചത്. ഇതോടെ ആദ്യ പകുതിയിൽ ഇരു ടീമുകളും 1-1 ന് പിരിഞ്ഞു.