മുംബൈ: വെസ്റ്റ് ഇന്‍ഡീസിനെതിരായ ആദ്യ ടെസ്റ്റില്‍ തകര്‍പ്പന്‍ വിജയം പിടിക്കാന്‍ ഇന്ത്യയ്‌ക്ക് കഴിഞ്ഞിരുന്നു. ഡൊമിനിക്കയിലെ വിൻഡ്‌സർ പാർക്കിൽ നടന്ന മത്സരത്തില്‍ ഇന്നിങ്‌സിനും 141 റണ്‍സിനുമായിരുന്നു ഇന്ത്യ വിജയം പിടിച്ചത്. ബാറ്റിങ്ങില്‍ ക്യാപ്റ്റന്‍ രോഹിത് ശര്‍മയും അരങ്ങേറ്റക്കാരന്‍ യശസ്വി ജയ്‌സ്വാളും സെഞ്ചുറി നേടിയപ്പോള്‍ അര്‍ധ സെഞ്ചുറിയുമായി വിരാട് കോലിയും തിളങ്ങിയിരുന്നു. പന്തുകൊണ്ടാവാട്ടെ രണ്ട് ഇന്നിങ്‌സിലുമായി 12 വിക്കറ്റുകള്‍ വീഴ്‌ത്തിയ ആര്‍ അശ്വിനാണ് വിന്‍ഡീസിന്‍റെ നടുവൊടിച്ചത്.
സ്‌പിന്നര്‍മാരെ പിന്തുണച്ച വിൻഡ്‌സർ പാർക്കിലെ പിച്ചില്‍ ഏറെ കരുതലോടെയാണ് ഇന്ത്യന്‍ ബാറ്റര്‍മാര്‍ ബാറ്റ് വീശിയത്. ഇക്കൂട്ടത്തില്‍ ഏറെ ക്ഷമയോടെയുള്ള വിരാട് കോലിയുടെ പ്രകടനം ശ്രദ്ധേയമായിരുന്നു. പതിവ് ശൈലിയില്‍ നിന്നും മാറി കളിച്ച കോലിക്ക് ഇന്നിങ്‌സിലെ തന്‍റെ ആദ്യ ബൗണ്ടറി കണ്ടെത്താന്‍ 80 പന്തുകളാണ് വേണ്ടി വന്നത്. ഇപ്പോഴിതാ വിരാട് കോലിയുടെ ഈ പ്രകടനത്തെക്കുറിച്ച് സംസാരിച്ചിരിക്കുകയാണ് ഇന്ത്യയുടെ മുന്‍ താരവും കമന്‍റേറ്ററുമായ ആകാശ് ചോപ്ര.
വിരാട് കോലി തന്‍റെ ഈഗോ മാറ്റിവച്ചാണ് വെസ്റ്റ് ഇന്‍ഡീസിനെതിരെ കളിച്ചതെന്നാണ് ആകാശ് ചോപ്ര പറയുന്നത്. 'വെസ്റ്റ് ഇന്‍ഡീസിനെതിരെ വിൻഡ്‌സർ പാർക്കിൽ വളരെ വ്യത്യസ്‌തമായ രീതിയിലാണ് വിരാട് കോലി (Virat Kohli ) കളിച്ചത്. 80 പന്തുകൾക്ക് ശേഷമാണ് കോലി ഇന്നിങ്‌സിലെ തന്‍റെ ആദ്യ ബൗണ്ടറി അടിച്ചത്. അത് ആഘോഷിക്കുകയും ചെയ്‌തു'.
'ഈ ഇന്നിങ്‌സിന്‍റെ ഏറ്റവും വലിയ പ്രത്യേകത എന്തെന്നാല്‍ ഈഗോ പൂര്‍ണമായും മാറ്റിവച്ചാണ് കോലി കളിച്ചതെന്നാണ്. നമുക്ക് അദ്ദേഹത്തെ ലോക ക്രിക്കറ്റിലെ രാജാവായി ആഘോഷിക്കാം. എന്നാല്‍ പിച്ചില്‍ കാര്യമായ പിന്തുണയില്ലെന്നും, അത്ര എളുപ്പം ഫോറുകൾ ലഭിക്കില്ലെന്നും തോന്നിയതോടെ 'കുഴപ്പമില്ല, ഞാൻ കാത്തിരിക്കാം' എന്നാണ് അദ്ദേഹം പറഞ്ഞത്. ഇതാണ് ഈ കളിക്കാരനെ ഏപ്പോഴും സ്പെഷ്യലാക്കുന്നത്'- ആകാശ് ചോപ്ര തന്‍റെ യൂട്യൂബ് ചാനലില്‍ പറഞ്ഞു.