ഹൈദരാബാദ് : അന്താരാഷ്‌ട്ര ടി20 ക്രിക്കറ്റില്‍ ഇന്ത്യയുടെ വിശ്വസ്‌തനായി മാറുകയാണ് സ്റ്റാര്‍ ബാറ്റര്‍ സൂര്യകുമാർ യാദവ്. ഈ വര്‍ഷം തികഞ്ഞ സ്ഥിരതയോടെയാണ് സൂര്യകുമാര്‍ ഇന്ത്യയ്‌ക്കായി ബാറ്റ് വീശുന്നത്. ഓസ്‌ട്രേലിയയ്‌ക്കെതിരായ മൂന്നാം ടി20യില്‍ അര്‍ധ സെഞ്ച്വറി നേടി തിളങ്ങിയ താരം ഇന്ത്യയുടെ വിജയ ശില്‍പിയായിരുന്നു.
36 പന്തില്‍ അഞ്ച് വീതം സിക്‌സും ഫോറും സഹിതം 69 റണ്‍സാണ് സൂര്യകുമാർ അടിച്ചുകൂട്ടിയത്. ഇതോടെ അന്താരാഷ്‌ട്ര ടി20യില്‍ ഈ വര്‍ഷം ഏറ്റവും കൂടുതല്‍ റണ്‍സ് നേടുന്ന ബാറ്ററെന്ന റെക്കോഡും സൂര്യകുമാര്‍ സ്വന്തമാക്കി. നിലവില്‍ 20 മത്സരങ്ങളില്‍ നിന്ന് 37.88 ശരാശരിയില്‍ 682 റണ്‍സാണ് സൂര്യകുമാറിന്‍റെ അക്കൗണ്ടിലുള്ളത്.
ഒരു സെഞ്ച്വറിയും നാല് അര്‍ധ സെഞ്ച്വറിയും ഉള്‍പ്പടെയാണ് താരത്തിന്‍റെ പ്രകടനം. 182.84 ആണ് സ്‌ട്രൈക്ക് റേറ്റ്. നേപ്പാളിന്‍റെ ദിപേന്ദ്ര സിങ്‌ ഐറിയാണ് പട്ടികയില്‍ രണ്ടാം സ്ഥാനത്ത്. 626 റണ്‍സാണ് ഈ വര്‍ഷം ദിപേന്ദ്ര സിങ്‌ നേടിയത്.