മുംബൈ : ഐപിഎല്ലില്‍ ഗുജറാത്ത് ടൈറ്റന്‍സിനെതിരായ നിര്‍ണായക മത്സരത്തില്‍ റോയല്‍ ചലഞ്ചേഴ്‌സ് ബാംഗ്ലൂരിന് ടോസ് നഷ്‌ടം. ടോസ് നേടിയ ഗുജറാത്ത് ക്യാപ്റ്റന്‍ ഹാര്‍ദിക് പാണ്ഡ്യ ബാറ്റിംഗ് തിരഞ്ഞെടുത്തു. സീസണില്‍ തങ്ങളുടെ അവസാന ഗ്രൂപ്പ് മത്സരം കളിക്കുന്ന ബാംഗ്ലൂർ ഇന്ന് തോറ്റാൽ പ്ലേ ഓഫ് കാണാതെ പുറത്താകും.
ഒരു മാറ്റവുമായിട്ടാണ് ഗുജറാത്ത് ഇറങ്ങുന്നത്. അല്‍സാരി ജോസഫിന് പകരം ലോക്കി ഫെര്‍ഗൂസണ്‍ ടീമിലെത്തി. ബാംഗ്ലൂരും ഒരു മാറ്റം വരുത്തി. മുഹമ്മദ് സിറാജിന് പകരം സിദ്ധാര്‍ഥ് കൗള്‍ ടീമിലെത്തി.
കളിച്ച 13 മത്സരങ്ങളില്‍ 10 ജയങ്ങള്‍ നേടിയ ഗുജറാത്ത് ഒന്നാം സ്ഥാനക്കാരായി തന്നെ പ്ലേ ഓഫ് ഉറപ്പിച്ചിട്ടുണ്ട്. 13 മത്സരങ്ങളില്‍ ഏഴ്‌ ജയത്തോടെ നിലവിലെ പോയിന്‍റ് പട്ടികയില്‍ അഞ്ചാം സ്ഥാനത്താണ് ബാംഗ്ലൂര്‍. 14 പോയിന്‍റാണ് സംഘത്തിനുള്ളത്. 13 മത്സരങ്ങളില്‍ 14 പോയിന്‍റുള്ള ഡല്‍ഹി ക്യാപിറ്റല്‍സ് റണ്‍ റേറ്റിന്‍റെ അടിസ്ഥാനത്തില്‍ ബാംഗ്ലൂരിന് മുകളില്‍ നാലാം സ്ഥാനത്തുണ്ട്.