ഇസ്‌ലാമാബാദ്:പാകിസ്ഥാനില്‍ ഇമ്രാന്‍ ഖാന്‍റെ നേതൃത്വത്തിലുള്ള തെഹരിക് ഇ ഇന്‍സാഫ്(പിടിഐ) സര്‍ക്കാറിന് ഭൂരിപക്ഷം നഷ്ടമായി. മുത്തഹിദ ക്വാമി മൂവ്മെന്‍റ് (എംക്യൂഎം-പി) പിടിഐയുടെ നേതൃത്വത്തിലുള്ള മുന്നണി വിട്ടു. എംക്യുഎമ്മും പാകിസ്ഥാന്‍ പീപ്പിള്‍സ് പാര്‍ട്ടിയും(പിപിപി) ഒരുമിച്ച് പ്രവര്‍ത്തിക്കാനുള്ള കരാറില്‍ എത്തിചേര്‍ന്നതായി പിപിപി അധ്യക്ഷന്‍ ബിലാവല്‍ ഭൂട്ടോ സര്‍ദാരി ട്വീറ്റ് ചെയ്തു.
കരാര്‍ ഇരു പാര്‍ട്ടികളുടെയും ഉന്നത തല സമിതികള്‍ അംഗീകരിച്ചതിന് ശേഷം കൂടുതല്‍ വിവരങ്ങള്‍ മാധ്യമങ്ങളെ അറിയിക്കുമെന്നും ബിലാവല്‍ ഭൂട്ടോ പറഞ്ഞു. നാളെയാണ്(31.03.2022) ഇമ്രാന്‍ ഖാന്‍ സര്‍ക്കാരിനെതിരെ പ്രതിപക്ഷം കൊണ്ടുവന്ന അവിശ്വാസ പ്രമേയത്തില്‍ ദേശീയ അസംബ്ലിയില്‍ വോട്ടെടുപ്പ് നടക്കുക. പാകിസ്ഥാന്‍ ദേശീയ അംസബ്ലിയില്‍ ആകെ 342 അംഗങ്ങളാണ് ഉള്ളത്. അവിശ്വാസ പ്രമേയം പാസകണമെങ്കില്‍ 172 അംഗങ്ങളുടെ വോട്ടാണ് ആവശ്യം.