ഒരു മാസത്തെ ഇടവേളയിൽ വീണ്ടും വാഹന വില വർധിപ്പിക്കാൻ മാരുതി സുസുക്കി. ഇൻപുട്ട് ചെലവ് വർധിച്ചതിനെ തുടർന്നാണ് വില ഉയര്‍ത്തുന്നതെന്ന് കമ്പനി അറിയിച്ചു. സെപ്റ്റംബർ മുതലാണ് പുതിയ നിരക്ക് പ്രാബല്യത്തിൽ വരിക.
പുതിയ നിരക്ക് സെപ്റ്റംബർ മുതല്‍ പ്രാബല്യത്തില്‍
എന്നാൽ ഏതൊക്കെ വാഹനങ്ങൾക്ക് എത്രത്തോളം വില വർധിക്കുമെന്ന് മാരുതി വ്യക്തമാക്കിയിട്ടില്ല. ഓരോ മോഡലിനും 15000 രൂപയോളം കൂടാനാണ് സാധ്യത.
ഈ വർഷം ഇത് മൂന്നാംതവണയാണ് മാരുതി വാഹന വില ഉയര്‍ത്തുന്നത്. ജൂലൈയിലും ജനുവരിയിലുമാണ് നേരത്തേ മാരുതി വാഹന വില കൂട്ടിയത്.
നിലവിൽ കമ്പനി എൻട്രി ലെവൽ ഹാച്ച്ബാക്ക് ആൾട്ടോ മുതൽ എസ്-ക്രോസ് വരെയുള്ള മോഡലുകൾക്ക് യാഥാക്രമം 2.99 ലക്ഷം മുതൽ 12.39 ലക്ഷം വരെയാണ് ഡൽഹി എക്സ്-ഷോറൂം വില.
ചിപ്പ് ക്ഷാമത്തെ തുടർന്ന് ഓഗസ്റ്റിൽ മാരുതി കാറുകളുടെ ഉത്പാദനവും കുറച്ചിരുന്നു. അഹമ്മദാബാദ് ആസ്ഥാനമായ നിർമാണ ശാലയായ സുസുക്കി മോട്ടോർ ഗുജറാത്ത് (എസ്എംജി) പ്ലാന്‍റിന്‍റെ പ്രവർത്തനങ്ങളാണ് കമ്പനി പരിമിതപ്പെടുത്തിയത്.