ജയ്‌പൂർ(രാജസ്ഥാൻ): ബിജെപി ദേശീയ അധ്യക്ഷൻ ജെപി നദ്ദയുടെ രണ്ടാമത്തെ മകൻ ഹരീഷ് നദ്ദ വിവാഹിതനാകുന്നു. പ്രമുഖ ഹോട്ടൽ വ്യവസായി രമാകാന്ത് ശർമ്മയുടെ മകൾ റിദ്ധി ശർമ്മയാണ് പ്രതിശ്രുത വധു. ജനുവരി 25ന് ജയ്‌പൂരിലെ രാജ്‌മഹൽ പാലസിൽ രാജകീയ ആഘോഷങ്ങളോടെയാണ് വിവാഹം.
ഹിമാചലി, രാജസ്ഥാനി ആചാരപ്രകാരമായിരിക്കും വിവാഹം. ക്ഷണിക്കപ്പെട്ട അതിഥികളും അടുത്ത സുഹൃത്തുക്കളും മാത്രമായിരിക്കും ചടങ്ങിൽ പങ്കെടുക്കുക. അതിഥികൾക്കായി ജയ്‌പൂരിലും ഡൽഹിയിലും വിവാഹ സൽക്കാരം ഒരുക്കിയിട്ടുണ്ടെന്നാണ് വിവരം.
ഡൽഹി, മുംബൈ, ഹിമാചൽ പ്രദേശ് എന്നിവിടങ്ങളിൽ നിന്നുള്ള പ്രമുഖ രാഷ്‌ട്രീയ നേതാക്കൾ ചടങ്ങിൽ പങ്കെടുക്കുമെന്നാണ് വിവരം. വിവാഹാഘോഷം നടക്കുന്ന പ്രദേശത്ത് പൊലീസ് കനത്ത സുരക്ഷ ക്രമീകരണങ്ങൾ ഏർപ്പെടുത്തിയിട്ടുണ്ട്. ജനുവരി 24, 25 തിയതികളിലാണ് വിവാഹ ചടങ്ങുകൾ നടക്കുക. വിവാഹ ശേഷം വധൂവരന്മാർ 26ന് ഡൽഹിയിലേക്ക് പോകും.