ಚಾಮರಾಜನಗರ: ಸಿಮ್ಸ್ ಘಟಿಕೋತ್ಸವದಲ್ಲಿ ಮಾತನಾಡಿದ ರಾಜೀವ್ ಗಾಂಧಿ ಆರೋಗ್ಯ ವಿಜ್ಞಾನ ಸಂಸ್ಥೆಯ ಕುಲಪತಿ ಡಾ.ಎಂ.ಕೆ.ರಮೇಶ್, ವಿದ್ಯಾರ್ಥಿಗಳು ಗುಣಮಟ್ಟದ ಕಲಿಕೆಯಿಂದ ಹೊರಗುಳಿಯಬಾರದೆಂದು ಎಂಬಿಬಿಎಸ್ ವಿದ್ಯಾರ್ಥಿಗಳಿಗೆ ನುರಿತ ತಜ್ಞರಿಂದ ಶೇ.25 ಆನ್ಲೈನ್ ಕ್ಲಾಸ್ಗಳನ್ನು ಶಾಶ್ವತವಾಗಿ ಮುಂದುವರೆಸುವ ಚಿಂತನೆ ಇದ್ದು, ಶೀಘ್ರದಲ್ಲೇ ಇತ್ಯರ್ಥವಾಗಲಿದೆ. ದೇಶಕ್ಕೆ ಸಂಶೋಧನಾ ಕ್ಷೇತ್ರದ ಮಹತ್ವ ಅರಿವಾಗಿದೆ, ತಂತ್ರಜ್ಞಾನದ ಬಳಕೆಯ ಅನಿವಾರ್ಯತೆಯೂ ಸೃಷ್ಟಿಯಾಗಿದೆ, ಆನ್ಲೈನ್ ಕ್ಲಾಸ್ ಎಂಬ ಹೊಸ ಮಾದರಿ ಪರಿಚಯವಾಗಿದೆ ಎಂದು ಅಭಿಪ್ರಾಯಪಟ್ಟರು.
ವೈದ್ಯ ಪದವಿ ಪಡೆದ ವಿದ್ಯಾರ್ಥಿಗಳು ಕನಿಷ್ಠ ಕರ್ತವ್ಯ ಅವಧಿಯಲ್ಲಾದರೂ ನಿಷ್ಠೆ, ಪ್ರಾಮಾಣಿಕತೆಯಿಂದ ಕೆಲಸ ಮಾಡಬೇಕು. ಯಾಕಾದರೂ ವೈದ್ಯನಾದೆನೋ ಎಂದುಕೊಳ್ಳುವವರು ಬಲವಂತದಿಂದ ವೃತ್ತಿ ಮಾಡದೆ ಬೇರೆ ವೃತ್ತಿಗಳನ್ನು ಕಂಡುಕೊಳ್ಳಬೇಕು, ವೈದ್ಯರ ನಿರ್ಲಕ್ಷ್ಯದಿಂದ ರೋಗಿಗಳ ನರಳಾಟ, ಪರದಾಟವನ್ನು ಯಾವುದೇ ಕಾರಣಕ್ಕೂ ಒಪ್ಪುವುದಿಲ್ಲ ಎಂದು ಪದವಿ ಪಡೆದ ವಿದ್ಯಾರ್ಥಿಗಳಿಗೆ ಕಿವಿಮಾತು ಹೇಳಿದರು.
ರೋಗಿ ಬಳಿ ಹಣ ಪಡೆಯುವುದು ಪಾಪದ ಕೆಲಸ:ವಿಜಿಕೆಕೆ ಸಂಸ್ಥಾಪಕ, ಪದ್ಮಶ್ರೀ ಪುರಸ್ಕೃತ ಡಾ.ಸುದರ್ಶನ್ ಮಾತನಾಡಿ, ಆಸ್ಪತ್ರೆಗಳು ದೇವಾಲಯಕ್ಕೆ ಸಮ, ಓರ್ವನನ್ನು ಹೇಗೆ ಬದುಕಿಸಬಹುದೆಂದು ಕಲಿಯುವ ಆರಾಧನಾ ಸ್ಥಳ ಎಂಬುದನ್ನು ವೈದ್ಯರು ಮರೆಯಬಾರದು, ರೋಗಿಗಳಿಂದ ಹಣ ಪಡೆಯುವುದು ಪಾಪದ ಕೆಲಸ. ಅದೇ ರೀತಿ ಸರ್ಕಾರವೂ ಕೂಡ ವೈದ್ಯರಿಗೆ ಕೊಡುತ್ತಿರುವ ವೇತನವನ್ನು ಹೆಚ್ಚಿಸಬೇಕು, ಈಗ ನೀಡುತ್ತಿರುವುದು ಅತ್ಯಲ್ಪ ಎಂದು ಒತ್ತಾಯಿಸಿದರು.