ಹಿರಿಯ ನಟ ಕಮಲ್ ಹಾಸನ್ ಅವರು ನಾಗ್ ಅಶ್ವಿನ್ ಅವರ ಬಹುಭಾಷಾ ವೈಜ್ಞಾನಿಕ ಸಿನಿಮಾ 'ಪ್ರಾಜೆಕ್ಟ್ ಕೆ' (Project K)ಗೆ ಆಯ್ಕೆಯಾಗಿದ್ದಾರೆ ಎಂದು ಚಿತ್ರ ತಯಾರಕರು ಇಂದು ಘೋಷಿಸಿದ್ದಾರೆ. ಪ್ರಭಾಸ್ ಮತ್ತು ದೀಪಿಕಾ ಪಡುಕೋಣೆ ಅವರ ಬಿಗ್ ಬಜೆಟ್ ಚಲನಚಿತ್ರವನ್ನು ವೈಜಯಂತಿ ಮೂವಿಸ್ ಸಂಸ್ಥಾಪಕ ಸಿ ಅಶ್ವನಿ ದತ್ ನಿರ್ಮಿಸಿಸುತ್ತಿದ್ದಾರೆ. ಬಿಗ್ ಬಿ ಅಮಿತಾಭ್ ಬಚ್ಚನ್ ಸಹ ಪ್ರಮುಖ ಪಾತ್ರ ವಹಿಸಲಿರುವ ಈ ಸಿನಿಮಾದಲ್ಲಿ ಕಮಲ್ ಹಾಸನ್ ಕೂಡ ಮುಖ್ಯ ರೋಲ್ನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.
ಪ್ರೊಡಕ್ಷನ್ ಹೌಸ್ ವೈಜಯಂತಿ ಮೂವಿಸ್ ತನ್ನ ಅಧಿಕೃತ ಟ್ವಿಟರ್ ಪೇಜ್ನಲ್ಲಿ ಈ ವಿಷಯವನ್ನು ಹಂಚಿಕೊಂಡಿದೆ. "ಶ್ರೇಷ್ಠ ನಟ ಕಮಲ್ ಹಾಸನ್ ಅವರಿಗೆ ಸ್ವಾಗತ. ನಮ್ಮ ಪ್ರಯಾಣ ಈಗ ಯೂನಿವರ್ಸಲ್ ಆಗುತ್ತಿದೆ #ProjectK" ಎಂದು ಟ್ವೀಟ್ ಮಾಡಿದೆ. ಕಮಲ್ ಹಾಸನ್ ಅವರನ್ನು ಚಿತ್ರತಂಡಕ್ಕೆ ಸ್ವಾಗತಿಸಿ, ವಿಡಿಯೋವೊಂದನ್ನು ಶೇರ್ ಮಾಡಿದೆ.
ಈ ವಿಡಿಯೋ ಕಮಲ್ ಹಾಸನ್ ಅವರ ಚಲನಚಿತ್ರಗಳ ಶಾಟ್‌ಗಳನ್ನು ಒಳಗೊಂಡಿದೆ. ಪ್ರೊಜೆಕ್ಟ್ ಕೆ ಚಿತ್ರದಿಂದ ಕಮಲ್ ಅವರ ನೋಟವನ್ನು ಚಿತ್ರ ತಯಾರಕರು ಇನ್ನೂ ಬಹಿರಂಗಪಡಿಸದಿದ್ದರೂ, ಅವರ ಪಾತ್ರ ಪ್ರಭಾವಶಾಲಿ ಆಗಿರಲಿದೆ ಎಂಬುದನ್ನು ವಿಡಿಯೋ ಸೂಚಿಸಿದೆ.
ಚಿತ್ರ ನಿರ್ಮಾಪಕರು ಹಿರಿಯ ನಟ ಕಮಲ್ ಹಾಸನ್ ಪಾತ್ರದ ಬಗ್ಗೆ ವಿವರಗಳನ್ನು ಮುಚ್ಚಿಟ್ಟಿದ್ದರೂ, ಪ್ರಭಾಸ್ ಪ್ರತಿಸ್ಪರ್ಧಿಯಾಗಿ ನಟಿಸಲು ಸೂಪರ್‌ ಸ್ಟಾರ್ ಮುಂದಾಗಿದ್ದಾರೆ ಎಂಬ ಊಹಾಪೋಹಗಳು ಹರಡಿವೆ. ನೆಗೆಟಿವ್ ಶೇಡ್ ಇರುವ ಪಾತ್ರವನ್ನು ಕಮಲ್ ಹಾಸನ್ ನಿರ್ವಹಿಸಿ 15 ವರ್ಷಗಳಾದ ಕಾರಣ ಅಭಿಮಾನಿಗಳಿಗೆ ಇದು ಕುತೂಹಲಕರ ಸಂಗತಿಯಾಗಿದೆ. ನಟ ಕೊನೆಯದಾಗಿ 2008 ರಲ್ಲಿ ಬಿಡುಗಡೆಯಾದ ದಶಾವತಾರಂನಲ್ಲಿ ವಿಲನ್ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಇನ್ನು ಆಗಸ್ಟ್‌ನಲ್ಲಿ ತಮ್ಮ ಪಾತ್ರದ ಚಿತ್ರೀಕರಣವನ್ನು ಪ್ರಾರಂಭಿಸುವ ಸಾಧ್ಯತೆಯಿದೆ.