ಪತ್ನಿ ಮೇಲಿನ ಅನುಮಾನ.. ಎರಡು ತಿಂಗಳ ಹೆಣ್ಣು ಮಗು ಕೊಲೆ ಮಾಡಿದ ಪಾಪಿ ತಂದೆ

ಹೆಂಡತಿ ಶೀಲ ಶಂಕಿಸಿರುವ ಪಾಪಿ ಗಂಡನೊಬ್ಬ ಎರಡು ತಿಂಗಳ ಅಮಾಯಕ ಹೆಣ್ಣು ಮಗುವಿನ ಕೊಲೆ ಮಾಡಿರುವ ಘಟನೆ ಆಂಧ್ರಪ್ರದೇಶದಲ್ಲಿ ನಡೆದಿದೆ.

ಅನಂತಪುರ(ಆಂಧ್ರಪ್ರದೇಶ):ಪತ್ನಿಯ ಶೀಲದ ಮೇಲೆ ಶಂಕೆ ವ್ಯಕ್ತಪಡಿಸಿರುವ ಗಂಡನೊಬ್ಬ ಎರಡು ತಿಂಗಳ ಹೆಣ್ಣು ಮಗುವಿನ ಕೊಲೆ ಮಾಡಿದ್ದಾನೆ. ಈ ಅಮಾನವೀಯ ಘಟನೆ ಆಂಧ್ರಪ್ರದೇಶದ ಅನಂತಪುರ ಜಿಲ್ಲೆಯ ಕಲ್ಯಾಣದುರ್ಗಂ ಮಂಡಲದಲ್ಲಿ ನಡೆದಿದೆ.

ಎರಡು ತಿಂಗಳ ಹೆಣ್ಣು ಮಗು ಕೊಲೆ ಮಾಡಿದ ಪಾಪಿ ತಂದೆ

ಪಾಪಿ ತಂದೆ ಎರಡು ತಿಂಗಳ ಮಗುವಿನ ಬಾಯಿಗೆ ಪ್ಲಾಸ್ಟರ್​ ಹಾಕಿ, ಸೆಣಬಿನ ಚೀಲದಲ್ಲಿ ಕಟ್ಟಿ ಕೆರೆಯಲ್ಲಿ ಎಸೆದಿದ್ದಾನೆ. ಪೊಲೀಸರು ನೀಡಿರುವ ಮಾಹಿತಿ ಪ್ರಕಾರ, ಮಲ್ಲಿಕಾರ್ಜುನ್​ ಮತ್ತು ಆತನ ಪತ್ನಿ ಚಿಟ್ಟೆಮ್ಮ ಎರಡು ತಿಂಗಳ ಮಗುವಿನೊಂದಿಗೆ ಕಲ್ಯಾಣದುರ್ಗದ ಆರ್​ಡಿಟಿ ಆಸ್ಪತ್ರೆಗೆ ತೆರಳಿದ್ದರು. ಮಗು ಅಳುತ್ತಿದ್ದ ಕಾರಣ ಮಲ್ಲಿಕಾರ್ಜುನ್ ತನ್ನ ಮಗಳನ್ನ ತೆಗೆದುಕೊಂಡು ಹೊರಗಡೆ ಹೋಗಿದ್ದಾನೆ. ಸಂಜೆ ಆದರೂ ವಾಪಸ್​ ಮನೆಗೆ ಬಂದಿಲ್ಲ. ಹೀಗಾಗಿ ಅನುಮಾನಗೊಂಡಿರುವ ಆತನ ಪತ್ನಿ ಚಿಟ್ಟೆಮ್ಮ ಪೊಲೀಸರಿಗೆ ದೂರು ನೀಡಿದ್ದಾಳೆ.

ತಕ್ಷಣವೇ ಕಾರ್ಯಪ್ರವೃತ್ತರಾಗಿರುವ ಪೊಲೀಸರು ಸಂಬಂಧಿಗಳ ಸಹಾಯದಿಂದ ರಾತ್ರಿಯಿಡೀ ಹುಡುಕಾಟ ನಡೆಸಿದ್ದಾರೆ. ಆದರೆ, ಅವರ ಬಗ್ಗೆ ಸುಳಿವು ಸಿಕ್ಕಿಲ್ಲ. ಇದಾದ ಬಳಿಕ ಮಲ್ಲಿಕಾರ್ಜುನ್​ ಹಾಗೂ ಮಗುವಿನ ಫೋಟೋ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ.

ಈ ವೇಳೆ ಆತ ಅನಂತಪುರದಲ್ಲಿ ಸಿಕ್ಕಿಬಿದ್ದಿದ್ದಾನೆ. ವಿಚಾರಣೆ ನಡೆಸಿದಾಗ ಮಗುವಿನ ಕೊಲೆ ಮಾಡಿರುವುದಾಗಿ ತಿಳಿಸಿದ್ದಾನೆ. ತದನಂತರ ಆರೋಪಿ ಕಲ್ಯಾಣದುರ್ಗಕ್ಕೆ ಆಗಮಿಸಿ, ಮಗುವಿನ ಶವ ಎಸೆದಿರುವ ಸ್ಥಳ ತೋರಿಸಿದ್ದಾನೆ. ಹಸುಳೆಯ ಶವ ವಶಕ್ಕೆ ಪಡೆದುಕೊಂಡಿರುವ ಪೊಲೀಸರು, ಕುಟುಂಬಕ್ಕೆ ಹಸ್ತಾಂತರ ಮಾಡಿದ್ದು, ಆತನನ್ನು ಬಂಧನ ಮಾಡಿದ್ದಾರೆ.