રવિવારે ફરી એકવાર વાપી પંથકમાં સાંબેલાધાર 9 ઇંચ વરસાદ ખાબકતા વાપીના તમામ વિસ્તાર પાણીમાં ગરકાવ થઇ ગયો હતો. વાપીમાં જલારામ મંદિર પરિસરમાં પણ પગથિયાં સુધી પાણી ભરાયા હતા. જ્યારે બાજુની સોસાયટીમાં પણ ઘૂંટણ સમા પાણી ભરાતા રહીશોએ મુશ્કેલીનો સામનો કરવો પડયો હતો.
જો કે, રવિવારના વરસાદમાં સરીગામ GIDCના ઉદ્યોકારોએ પારાવાર મુશ્કેલી સહન કરવી પડી છે. સરીગામ GIDCમાં થોડા દિવસ પહેલા જ પ્રિમોન્સૂન કામગીરી કરવામાં આવ્યા બાદ મોટાભાગમાં એકમોમાં પાણી ભરાતા મોટું નુકસાન થયું છે.
ઉદ્યોગકારોએ પોતાનો રોષ ઠાલવતા જણાવ્યું હતું કે, સરીગામ ઇન્ડસ્ટ્રીઝ એસોસિએશન અને નોટિફાઇડ દ્વારા વરસાદ પહેલા પ્રિમોન્સૂન કામગીરી કર્યા બાદ પણ આ કામગીરી યોગ્ય રીતે નહીં કરતા આ પાણી ભરાયા છે અને મોટું નુકસાન થયું છે. આશા રાખીએ કે, તંત્ર આ માટે આગામી દિવસોમાં તમામ વરસાદી પાણીની ગટર અને પાણીના અવરોધો દૂર કરશે નહીં તો આ ચોમાસામાં ઉદ્યોગકારોને મોટું નુકસાન સહન કરવાનો વખત આવશે.
સરીગામ GIDC ઉપરાંત સરીગામ ગામમાં પણ મુખ્ય બજારમાં વરસાદી પાણીનો ભરાવો થતાં લોકોએ મુશ્કેલીનો સામનો કર્યો હતો અને તંત્રની કામગીરી પર સવાલો ઉઠાવ્યા હતાં. ગામમાં મોટાભાગના બંગલામાં અને એપાર્ટમેન્ટમાં ઘૂંટનણ સમા પાણી ભરાયા ગયા હતા. જેનો નિકાલ કરવા માટે લોકો જાતે જ વરસતા વરસાદમાં કામે લાગ્યા હતા.