સુરત: સામાન્ય રીતે ચોમાસાની ઋતુમાં વરસાદ વરસતો હોય છે. જેને લઈને પાણી ભરાતા કાદવનું સામ્રાજ્ય જોવા મળતું હોય છે પરંતુ સુરતના વરાછા વિસ્તારમાં આવેલી વિઠ્ઠલ નગર સોસાયટીમાં તો ભર શિયાળે ચોમાસા જેવા દ્રશ્યો સામે આવ્યા છે. આખી સોસાયટી અને રહીશોના ઘરોમાં જાણે કાદવનો જ્વાળામુખી ફાટ્યો હોય તેવા દ્રશ્યો સામે આવ્યા છે. આ સોસાયટીમાં રહેતા રહીશોના ઘરોમાં નળમાં પાણીની જગ્યાએ કાદવ નીકળી રહ્યો છે અને તે જોઇને રહીશો પણ ચોકી ઉઠ્યા છે.
મેટ્રોના અધિકારીઓ પણ દોડતા થઇ ગયા:સ્થાનિકોના જણાવ્યા મુજબ સોસાયટીની પાસે મેટ્રોની કામગીરી થઇ રહી છે અને મેટ્રોની કામગીરીને લઈને આ પરિસ્થિતિનું નિર્માણ થયું છે. બીજી તરફ આખી સોસાયટી અને રહીશોના ઘરમાં કાદવ જ કાદવ જોવા મળતા રહીશો રોષે ભરાયા હતા આ ઘટના બાદ મનપા અને મેટ્રોના અધિકારીઓ પણ દોડતા થઇ ગયા હતા આ સમગ્ર મામલે મેટ્રો અને મનપાની અધિકારીઓની ટીમે આ ઘટનાને લઈને તપાસનો ધમધમાટ શરુ કર્યો છે.
ઘરના સામાનને પણ નુકશાન:રહીશોએ જણાવ્યું હતું કે આજુ બાજુ મેટ્રોની કામગીરી થઇ રહી છે અને આ જ કામગીરીને લઈને સોસાયટીમાં કાદવ ઉભરાયો છે. ઘરોમાં કાદવ નીકળતા ઘરવખરી તેમજ ઘરના સર સમાનને પણ નુકશાન થયું છે. તેમજ આખી સોસાયટીના રહીશો હાલ હાલાકી ભોગવી રહ્યા છે. રહીશો દ્વારા કાદવ ઘરમાં પ્રવેશે નહી તે માટે ઇંટની આડાશ મુકવી પડી છે.