અમદાવાદમાં દિલ્હીના યુવકો પાસેથી તોડપાણી કરનારા પોલીસકર્મીઓ સસ્પેન્ડ કરાયાં, સફિન હસનની કાર્યવાહી

અમદાવાદ : વિશ્વ કપની ફાઇનલ મેચ જોવા આવેલા દિલ્હીના યુવકો સાથે 20 હજારનો તોડ કરનાર પોલીસકર્મીઓ સસ્પેન્ડ કરવામાં આવ્યા છે. ભારત અને ઓસ્ટ્રેલિયાની મેચ જોવા આવેલા દિલ્હીના યુવકો પાસે પોલીસ જવાનોએ 2 લાખની માંગણી કરી હતી. પરંતુ યુવકો પાસે પૈસા ન હોવાથી મામલો 20 હજારમાં પતાવવામાં આવ્યો હતો.

20 હજારનો તોડ કર્યો : આ તોડકાંડની સંપૂર્ણ ઘટનાની વાત કરવામાં આવે તો નાના ચીલોડા ટ્રાફિક પોઈન્ટ પાસે યુવકો પાસે દારૂની બોટલ મળતાં તોડ થયાનો આક્ષેપ થયો હતો. ત્યારે કારમાં દારૂની બોટલ હોવાથી પોલીસકર્મીઓએ 20 હજારનો તોડ કર્યો હતો. આ મામલે પોલીસ કર્મચારીઓ દ્વારા 2 લાખની માંગણી કરાઈ હતી. જે બાદ 20 હજાર UPI કરાવી તોડ કર્યાનો આરોપ મુકવામાં આવ્યો હતો. ટ્રાફિક પોલીસ અને TRB જવાને દારૂની બોટલ અંગે કાર્યવાહી નહી કરી રૂપિયા પડાવવાનો પ્લાન કર્યો હતો.

તાત્કાલિક કાર્યવાહી હાથ ધરવામાં આવી : આ સમગ્ર ઘટના ટ્રાફિક ડીસીપી સફિન હસનના ધ્યાને આવતા તાત્કાલિક કાર્યવાહી હાથ ધરવામાં આવી હતી. તપાસ દરમ્યાન ટ્રાફિક પોલીકર્મીઓએ યુવકો પાસેથી 20 હજાર પડાવ્યા હોવાની વાતમાં તથ્ય સાબિત થતાં રૂપિયા પરત કર્યા હતા. જોકે પોલીસ બેડામાં લાંછનરૂપ આ ઘટનાં અંગેની આ કેસની સમગ્ર તપાસ કે ડિવિઝન એસીપીને સોંપાતા આગળની કાર્યવાહી શરૂ કરવામાં આવી છે.

નિવેદન લેવાની કાર્યવાહી : હાલ અધિકારીઓ દ્વારા તમામ પોલીસકર્મીઓનાં નિવેદન લેવાની કાર્યવાહી શરૂ કરાઈ છે. ત્યારે સાંજ સુધીમાં ટ્રાફિક ડીસીપીએ પોલીસકર્મીઓ વિરૂદ્ધ મોટી કાર્યવાહી કરતા ફફડાટ ફેલાઈ ગયો છે.

યુવકના નિવેદનનું વિડીયો રેકોર્ડિંગ કરાશે :અમદાવાદ પોલીસે તોડકાંડનો ભોગ બનનાર દિલ્હીના યુવક કાનવ માનચંદાનો સંપર્ક કરતા તેણે ફરિયાદ કરવાની અનિચ્છા દર્શાવી છે, જો કે ટ્રાફિક વિભાગની એક ટીમ દિલ્હી મોકલવામાં આવી છે. ટ્રાફિક વિભાગના પીઆઇ અગ્રાવતની ટીમ દિલ્હી નીકળી ચૂકી છે. દિલ્હી જઈને તેની ફરિયાદ લેવામાં આવશે અને વિડીયો રેકોર્ડિંગ પણ કરવામાં આવશે.

રુપિયા પરત કરવામાં આવ્યાં :આ તોડકાંડમાં દિલ્હીના યુવક કાનવ માનચંદા પાસેથી ટ્રાફિક પોલીસ કર્મીઓએ રૂ.20,000 પડાવ્યાં હતા. આ નાણાં UPI મારફતે ત્રાહિત વ્યક્તિ અરુણ હડિયોલના ખાતામાં ટ્રાન્સફર કરાવાયા હતાં. પોલીસે આ વ્યક્તિ પાસેથી રોકડા રૂપિયા લઈને તમામ રકમ દિલ્લીના યુવકને પરત કરવામાં આવી છે. જોકે હવે પોલીસ આગળ શું કાર્યવાહી કરે છે તે જોવું રહ્યું.