અમદાવાદઃવર્લ્ડકપ 2023ની ફાઈનલ મેચ માટે આખો દેશ બંને ટીમના ખેલાડીઓ સાથે તૈયાર છે. જો ભારતીય ટીમ ઓસ્ટ્રેલિયા સામેની ફાઈનલ મેચ જીતશે તો તે ત્રીજી વખત ટ્રોફી કબજે કરશે. આ પહેલા ભારતે 1983માં કપિલ દેવના નેતૃત્વમાં અને 2011માં મહેન્દ્ર સિંહ ધોનીના નેતૃત્વમાં વર્લ્ડ કપ જીત્યો હતો. આજે અમદાવાદમાં રોહિત શર્માના નેતૃત્વમાં ભારતીય ટીમ વર્લ્ડ ચેમ્પિયન બનવા માટે સંપૂર્ણ રીતે તૈયાર છે.
આજે વિરાટનું રમવું જરૂરીઃઆ મેચમાં આખા દેશની નજર ભારતના સ્ટાર બેટ્સમેન વિરાટ કોહલી પર ટકશે. કોહલીને મોટી મેચનો ખેલાડી માનવામાં આવે છે. અને કોહલી ચેઝ માસ્ટરના નામથી પ્રખ્યાત છે. દરેક વ્યક્તિ ઈચ્છશે કે તે આ મેચમાં શાનદાર સદી ફટકારે અને ભારત માટે આ વર્લ્ડ કપ જીતે. વિરાટ કોહલીએ આ વર્લ્ડ કપમાં અત્યાર સુધીમાં 700થી વધુ રન બનાવ્યા છે. જેમાં ત્રણ સદીનો સમાવેશ થાય છે. તાજેતરમાં જ ન્યુઝીલેન્ડ સામે સદી ફટકારીને તેણે સચિન તેંડુલકરના 49 સદીના રેકોર્ડને તોડ્યો હતો.
હેઝલવુડ અને ઝમ્પાથી સાવધાન રહેવું પડશેઃ ઓસ્ટ્રેલિયાના બે મહત્વના બોલર જોશ હેઝલવુડ અને એડમ ઝમ્પા પણ ફોર્મમાં છે. અને આ બંને બોલરો સામે વિરાટ કોહલીનો રેકોર્ડ સારો નથી. કોહલીએ આ પડકારને પાર કરવો પડશે. આ વર્લ્ડ કપમાં મોહમ્મદ શમી (23) પછી એડમ ઝમ્પા (22) સૌથી વધુ વિકેટ લેનાર બોલર છે. જોશ હેઝલવુડે પણ 10 મેચમાં 14 વિકેટ લીધી છે. અને બેટ્સમેનોને ખૂબ પરેશાન કર્યા છે.