#JeeneDo: ગુજરાતમાં 3 વર્ષમાં મહિલા અત્યાચારના 25,261 ગુનાઓ નોંધાયા, 4454 ગુનાઓ સાથે અમદાવાદ મોખરે

• રાજ્યમાં દર વર્ષે વધી રહ્યા છે મહિલા અત્યાચારના ગુનાઓ
• રાજ્યમાં સૌથી વધુ મહિલા અત્યાચારના ગુનાઓ અમદાવાદમાં
• 4 મહાનગરોની સરખામણીએ વડોદરામાં સૌથી ઓછા ગુના નોંધાયા

ન્યૂઝ ડેસ્ક: એક રીતે કહેવાય છે કે, ગુજરાત ગુનાખોરીમાં અન્ય રાજ્યો કરતા પાછળ છે, પરંતુ ગુજરાતમાં નોંધાતા કુલ ગુનાઓ પૈકી મહિલા અત્યાચારના ગુનાઓની વાત કરવામાં આવે તો હકીકત કંઈક જુદી જ સામે આવે છે. નેશનલ ક્રાઈમ રેકોર્ડ બ્યૂરો (NCRB) દ્વારા જાહેર કરાયેલા આંકડા મુજબ ગુજરાતમાં વર્ષ 2017થી 2019 સુધીમાં મહિલા અત્યાચારના કુલ 25,621 ગુનાઓ નોંધાયા છે. જે કુલ કેસના 27.1 ટકા છે. રાજ્યના 4 મહાનગરો પૈકી સૌથી વધુ 4454 ગુનાઓ સાથે અમદાવાદ પ્રથમ ક્રમાંકે છે. જ્યારે, 2286 ગુનાઓ સાથે સુરત બીજા ક્રમાંકે, 1016 ગુનાઓ સાથે રાજકોટ ત્રીજા ક્રમાંકે અને 953 ગુનાઓ સાથે વડોદરા ચોથા ક્રમાંકે આવે છે.

આંકડાકીય માહિતી

રાજ્યમાં દર વર્ષે વધી રહ્યા છે મહિલા અત્યાચારના ગુનાઓ

ગુજરાત રાજ્યની વાત કરીએ તો રાજ્યમાં નોંધાતા કુલ ગુનાઓ પૈકી 27.1 ટકા ગુનાઓ મહિલા અત્યાચારના હોય છે. રાજ્યમાં વર્ષ 2017થી 2019 દરમિયાન મહિલા અત્યાચારના કુલ 25,261 ગુનાઓ નોંધાયા છે. જે પૈકી 8,133 ગુનાઓ વર્ષ 2017માં, 8,329 ગુનાઓ વર્ષ 2018માં અને વર્ષ 2019માં કુલ 8,799 ગુનાઓ નોંધાયા છે. આ ત્રણ વર્ષ દરમિયાન રાજ્યમાં મહિલા અત્યાચારના ગુનાઓની સંખ્યામાં ઉત્તરોત્તર વધારો જોવા મળ્યો છે.

અમદાવાદમાં નોંધાયેલા કુલ કેસના 54.4 ટકા કેસ મહિલા અત્યાચારના

NCRBના ડેટા મુજબ, ગુજરાતમાં અમદાવાદ શહેર મહિલા અત્યાચારના ગુનાઓમાં સૌથી મોખરે છે. શહેરમાં વર્ષ 2017 દરમિયાન મહિલા અત્યાચારના કુલ 1,405 ગુનાઓ નોંધાયા હતા. 2018માં તે વધીને 1,416 થયા હતા. જ્યારે 2019માં શહેરમાં ફરીથી મહિલા અત્યાચારના ગુનાઓ વધીને 1633 પર પહોંચ્યા હતા. જેના પરથી સ્પષ્ટપણે સાબિત થાય છે કે, અમદાવાદમાં મહિલા અત્યાચારના ગુનાઓ ઘટવાની જગ્યાએ સતત વધી રહ્યા છે.

ડાયમંડ સિટી સુરતમાં નોંધાયેલા કુલ કેસના 51 ટકા કેસ મહિલા અત્યાચારના

સુરત શહેર રાજ્યમાં મહિલા અત્યાચારના ગુનાઓમાં બીજા ક્રમાંકે છે. સુરતમાં વર્ષ 2017 દરમિયાન મહિલા અત્યાચારના કુલ 559 કેસ નોંધાયા હતા. જે વર્ષ 2018માં વધીને 712 થયા હતા. વર્ષ 2019માં એકાએક વધારા સાથે સુરતમાં મહિલા અત્યાચારના 1,015 કેસ નોંધાયા હતા. આંકડાઓ પરથી સુરતમાં પણ મહિલા અત્યાચારના ગુનાઓમાં વધારો થતો હોવાનું જાણી શકાય છે.

રંગીલા રાજકોટમાં ત્રણ વર્ષમાં મહિલા અત્યાચારના 1,016 કેસ

અમદાવાદ અને સુરતની સરખામણીએ રાજકોટમાં મહિલા અત્યાચારના ખૂબ જ ઓછા કેસ નોંધાયા છે. સુરતમાં વર્ષ 2019માં મહિલા અત્યાચારના 1,015 કેસ નોંધાયા હતા. તેની સામે રાજકોટમાં વર્ષ 2017થી 2019 દરમિયાન કુલ 1,016 કેસ નોંધાયા છે, પરંતુ રાજકોટમાં નોંધાયેલા કુલ ગુનાઓ પૈકી 46.5 ટકા ગુનાઓ મહિલા અત્યાચારના ગુના છે. રાજકોટમાં વર્ષ 2017માં 319, વર્ષ 2018માં 390 અને વર્ષ 2019માં કુલ 307 કેસ નોંધાયા છે.

સંસ્કારી નગરી વડોદરામાં ત્રણ વર્ષમાં માત્ર 953 ગુનાઓ

ઉપરોક્ત ત્રણેય મહાનગરોની સરખામણીએ વડોદરામાં મહિલા અત્યાચારના સૌથી ઓછા 953 ગુનાઓ નોંધાયા છે. વડોદરામાં વર્ષ 2017માં 316 ગુનાઓ નોંધાયા હતા. જે વર્ષ 2018માં ઘટીને 293 થયા હતા. જ્યારબાદના વર્ષ 2019માં વધીને 344 થઈ ગયા હતા. વડોદરાને બાદ કરતા અન્ય 3 મહાનગરોમાં દર વર્ષે મહિલા અત્યાચારના ગુનાઓમાં વધારો જોવા મળ્યો છે. જ્યારે વડોદરામાં જ વર્ષ 2018માં ગુનાઓની સંખ્યામાં ઘટાડો જોવા મળ્યો છે.