નવી દિલ્હી:સ્થાનિક અદાલત દ્વારા નો-ઓબ્જેક્શન સર્ટિફિકેટ (NOC) જારી કર્યાના બે દિવસ પછી, કોંગ્રેસના ભૂતપૂર્વ અધ્યક્ષ રાહુલ ગાંધીને રવિવારે નવો સામાન્ય પાસપોર્ટ મળ્યો અને હવે તેઓ સોમવારે યુએસ જવા રવાના થશે. સૂત્રોએ આ માહિતી આપી છે. કોંગ્રેસના પૂર્વ અધ્યક્ષે સંસદ સભ્ય તરીકે તેમને આપવામાં આવેલ ડિપ્લોમેટિક પાસપોર્ટ જમા કરાવ્યા બાદ સામાન્ય પાસપોર્ટ માટે અરજી કરી હતી. કોંગ્રેસના ભૂતપૂર્વ પ્રમુખને ગુનાહિત માનહાનિના કેસમાં દોષિત ઠેરવ્યા બાદ ગુજરાતના સુરતની એક અદાલત દ્વારા સાંસદ તરીકે ગેરલાયક ઠેરવવામાં આવ્યા હતા. આ પછી રાહુલે રાજદ્વારી પ્રવાસના દસ્તાવેજો પરત કર્યા હતા.
અમેરિકાના અન્ય કેટલાક શહેરોમાં પણ કાર્યક્રમો: રાહુલ ગાંધી સોમવારે સાંજે અમેરિકાના સાન ફ્રાન્સિસ્કો જવા રવાના થવાના છે. તેઓ અમેરિકાના અન્ય કેટલાક શહેરોમાં પણ કાર્યક્રમો ધરાવે છે. 4 જૂને તેઓ ન્યૂયોર્કમાં ભારતીય મૂળના લોકોને સંબોધિત કરશે. સૂત્રોએ જણાવ્યું કે પાસપોર્ટ ઓફિસે રવિવારે પાસપોર્ટ મળી જશે તેવી ખાતરી આપી હતી અને બપોરે મળી ગયો હતો. દિલ્હીની એક કોર્ટે શુક્રવારે રાહુલ ગાંધીને સામાન્ય પાસપોર્ટ 10 વર્ષની જગ્યાએ ત્રણ વર્ષ માટે જારી કરવા માટે નો-ઓબ્જેક્શન સર્ટિફિકેટ જારી કર્યું હતું.
આ કેસમાં રાહુલ ગાંધી આરોપી: નેશનલ હેરાલ્ડ કેસના ફરિયાદી એવા ભાજપના નેતા સુબ્રમણ્યમ સ્વામીના વાંધાને પગલે ત્રણ વર્ષ માટે તે જારી કરવામાં આવ્યું હતું. આ કેસમાં રાહુલ ગાંધી આરોપી છે. રાહુલ ગાંધી સાન ફ્રાન્સિસ્કોની પ્રતિષ્ઠિત સ્ટેનફોર્ડ યુનિવર્સિટીના વિદ્યાર્થીઓ સાથે વાતચીત કરશે. ત્યારબાદ તેઓ વોશિંગ્ટનમાં એક પ્રેસ કોન્ફરન્સને સંબોધશે અને ધારાશાસ્ત્રીઓ અને થિંક ટેન્ક સાથે બેઠકો કરશે. અમેરિકાના તેમના અઠવાડિયાના પ્રવાસ દરમિયાન તેઓ ભારતીય અમેરિકનોને પણ સંબોધિત કરે તેવી શક્યતા છે.