કચ્છઃ સામખિયાળીમાં 31 જાન્યુઆરીના રોજ મૌલાના અઝહરીએ એક ધાર્મિક કાર્યક્રમના આયોજનમાં ભાષણ આપ્યું હતું. આ કાર્યકમમાં આપેલ ભાષણનો વીડિયો વાયરલ થયો હતો. ત્યારબાદ પુરાવા મેળવીને સામખિયાળી પોલીસ મથકે આયોજક મામદખાન મુર તથા મૌલાના સામે ફરિયાદ નોંધવામાં આવી હતી.હેટ સ્પીચ મામલે આજે ભચાઉ કોર્ટમાં આરોપી મૌલાના અઝહરીને રજૂ કરાયો હતો. ભચાઉ કોર્ટે પોલીસે માંગેલા 14 દિવસના રિમાન્ડને બદલે 3 દિવસના રિમાન્ડને મંજૂરી આપી. હવે રવિવાર સુધી મૌલાના સામખિયાળી પોલીસના જાપ્તામાં રહેશે. જ્યાં પોલીસ તેની વધુ પુછપરછ હાથ ધરશે.
પૂર્વ કચ્છ પોલીસની કાર્યવાહીઃ પૂર્વ કચ્છ પોલીસે સામખિયાળી પોલીસ મથકે નોંધેલ ફરિયાદ મુજબ મુફ્તી સલમાન અઝહરીનો કબ્જો મેળવવા ગત રાત્રે રાજકોટ પહોંચી હતી. રાત્રે ટ્રાન્સફર વોરંટથી મુફ્તી સલમાન અઝહરીનો કબજો મેળવીને વહેલી સવારે મુફ્તી સલમાન અઝહરી સાથે પૂર્વ કચ્છ પોલીસ સામખિયાળી પહોંચી હતી. અહીં પ્રાથમિક પુછપરછ બાદ મૌલાના સલમાન અઝહરીને પણ ભચાઉ કોર્ટમાં ચુસ્ત પોલીસ બંદોબસ્ત વચ્ચે રજૂ કરવામાં આવ્યો હતો. જેમાં રેન્જ આઈ.જી. સહિત પોલીસના અધિકારી અને કર્મચારીનો કાફલો તૈનાત રહ્યો હતો.