কলিয়াবৰ, 9 জুলাই :নতুন শিক্ষা নীতিক আদৰণি জনাইছে লেখক, সমালোচক ময়ূৰ বৰাই ৷ নতুন শিক্ষা নীতিত মাধ্যম বিতৰ্ক সম্পৰ্কত লেখকগৰাকীয়ে কয়, দেশৰ প্ৰধানমন্ত্ৰী তথা গৃহ মন্ত্ৰীয়েও শিক্ষাৰ মাধ্যম মাতৃভাষাৰ লগত সংপৃক্ত হ'লেহে শিক্ষাৰ্থীৰ বিদ্যায়তনিক বিকাশ সহজসাধ্য হয় বুলি মন্তব্য কৰিছে । লগতে বৰাই নতুন শিক্ষা নীতিৰ ওপৰত আৰু অধিক আলোচনা-বিলোচনাৰ প্ৰয়োজনীয়তাৰ পোষকতা কৰে । এই ক্ষেত্ৰত কেৱল চৰকাৰী পক্ষই নহয় শিক্ষক সমাজৰো মতামত গ্ৰহণ কৰাটো আৱশ্যক বুলি কয় বৰাই ।
শিক্ষাৰ মাধ্যম সন্দৰ্ভত দেশৰ প্ৰধান মন্ত্ৰী আৰু গৃহ মন্ত্ৰীৰ মন্তব্যক গুৰুত্ব দিলে নতুন শিক্ষা নীতি নিশ্চয় আদৰণীয় হ’ব বুলিও কয় লেখকগৰাকীয়ে । নতুন শিক্ষা নীতি সন্দৰ্ভত সৃষ্টি হোৱা খাম-খেয়ালিবোৰ নাইকিয়া কৰিবলৈ সকলো পক্ষকে আলোচনাৰ মাজলৈ আনি বিষয়বোৰ মীমাংসা কৰাৰ বাবে পৰামৰ্শ আগবঢ়ায় ময়ূৰ বৰাই । আনহাতে, শিক্ষকসকলৰ প্ৰতি কৰা উপলুঙাসূচক মন্তব্যৰ তীব্ৰ বিৰোধিতা কৰি ময়ূৰ বৰাই কয়, চৰকাৰী বিষয়া-কৰ্মচাৰীক বিভিন্ন নীতি-নিৰ্দেশনা দিয়াৰ কৰ্তৃত্ব চৰকাৰৰ আছে । সেই ক্ষেত্ৰত শিক্ষকসকলৰো দায়িত্ব আছে । কিন্তু শিক্ষকসকলক এনে ক্ষেত্ৰত পেংলাই কৰা বা উপলুঙা কৰা কাৰ্যৰ বিৰুদ্ধে বিদ্যায়তনিক জগতখনক ভালপোৱা লোকসকলে প্ৰতিবাদ কৰা উচিত । যদি কোনো শিক্ষকৰ শিক্ষকতাৰ গুণ নাই, তেনে শিক্ষকক চিনাক্ত কৰি বদলি কৰক বা শাস্তি দিয়ক তাত আপত্তি কৰিবলগীয়া নাই । কিন্তু তাকে নকৰি সকলো শিক্ষককে সামৰি যিকোনো মন্তব্য প্ৰকাশ কৰাটো বৰ্জন কৰিব লাগে বুলি সংবাদ মাধ্যমৰ আগত কয় ময়ূৰ বৰাই ।