ত্ৰিপুৰাত নিচা জাতীয় সামগ্ৰীৰ সৈতে আটক অসমৰ যুৱক

ত্ৰিপুৰা হৈ বাংলাদেশলৈ নিচা জাতীয় সামগ্ৰী সৰবৰাহৰ যোগসূত্ৰ বৰাকৰ সৈতে থকাৰ তথ্য প্ৰতিবাৰেই প্ৰমানিত হয় । বৰাকৰ পৰা এটা বৃহৎ ড্ৰাগছ সৰবৰাহকাৰীৰ চক্ৰই চলাই আহিছে নিচাৰ সাম্ৰাজ্য । তেনে সময়তে নিচা জাতীয় সামগ্ৰীৰ সৈতে ত্ৰিপুৰা আৰক্ষীয়ে আটক কৰে অসমৰ যুৱকক ৷

কৰিমগঞ্জ, 4 জানুৱাৰীঃপুনৰ বুজন পৰিমাণৰ নিচা জাতীয় সামগ্ৰীৰ সৈতে ত্ৰিপুৰা আৰক্ষীৰ জালত পৰিছে অসমৰ যুৱক ৷ পঞ্চাশ লাখ টকাৰ ইয়াবা টেবলেটৰ সৈতে ত্ৰিপুৰাত আটক হৈছে কৰিমগঞ্জৰ যুৱক ৷ নিচা জাতীয় সামগ্ৰী সৰবৰাহকাৰী যুৱকৰ নাম ছালেহ আহমেদ ৷ ছালেহ আহমেদৰ ঘৰ পাথাৰকান্দি আৰক্ষী থানাৰ অন্তৰ্গত ফৰিদকোনা নয়াগ্ৰাম গাঁৱত ৷

ধৃত যুৱকজনৰ পৰা ত্ৰিপুৰা আৰক্ষীয়ে 9800 ইয়াবা টেবলেট জব্দ কৰে ৷ তথ্য অনুসৰি উত্তৰ ত্ৰিপুৰা জিলাৰ তাৰকপুৰ এলেকাৰ পৰা ত্ৰিপুৰা আৰক্ষীয়ে ছালেহ আহমেদক বৃহৎ পৰিমানৰ নিচা জাতীয় সামগ্ৰীৰ সৈতে আটক কৰিবলৈ সক্ষম হয় । উল্লেখ্য যে, নিচা জাতীয় সামগ্ৰীৰ বিৰুদ্ধে প্ৰতিবাৰেই সফলতাৰ মুখ দেখিবলৈ পায় ত্ৰিপুৰা আৰক্ষীয়ে ৷ আনহাতে অসম আৰক্ষীৰ চকুৰ সন্মুখৰ পৰা অসম সীমান্ত পাৰ হৈ সৰবৰাহকাৰী সকল অনায়াসে কেনেকৈ ত্ৰিপুৰাত প্ৰৱেশ কৰিব পাৰে ইয়াক লৈ এতিয়া প্ৰশ্নৰ উদয় হৈছে ৷

লগতে পঢ়ক - গুৱাহাটীত খেলো ইণ্ডিয়া ২০২০ৰ প্ৰস্তুতি তুংগত