বৰপেটা, ২৪ জুলাইঃ বৰপেটা জিলাত বান অৱস্থাৰ সামান্য উন্নতি হৈছে যদিও এতিয়াও বহু শিবৰত আশ্ৰয় লৈ আছে বন্যাৰ্তই ৷ জিলাখনত সৃষ্টি হোৱা অভাৱনীয় বান পৰিস্থিতিৰ সন্মুখীন হোৱা বন্যাৰ্তক জিলা প্ৰশাসনে শিবিৰ পাতি আশ্ৰয় প্ৰদান কৰিছে ৷ আনহাতে জিলাখনৰ বহু লোকৰ ঘৰ দুৱাৰ বানত জলমগ্ন হৈ পৰাৰ ফলত চৰ অঞ্চলৰ ওখ ভেটি,মথাউৰি আদিৰ লগতে বহু বিদ্যালয় গৃহত আশ্ৰয় লৈছে বন্যাৰ্তই ৷
লগতে পঢ়কঃস্বাধীনতা দিৱসৰ বাবে গৃহ মন্ত্ৰণালয়ৰ নিৰ্দেশনা জাৰি
জনীয়া সমষ্টিৰ বানত আক্ৰান্ত 50 টা পৰিয়ালৰ প্ৰায় 300 জন লোক 279 নম্বৰ চনপুৰা প্ৰাথমিক বিদ্যালয়ত আশ্ৰয় লৈ আছে ৷ উক্ত শিবিৰটোত আশ্ৰয় লৈ থকা শিশুৰ সংখ্যা 80 ৷ কিন্তু চৰকাৰী শিবিৰৰ তালিকাত নাম নাই এই শিবিৰটোৰ ৷ একেদৰে জনীয়া সমষ্টিৰ হাজি কৈবত আলি এম ই মাদ্ৰাছাখনতো আশ্ৰয় লৈ আছে বানত আক্ৰান্ত 40টা পৰিয়ালৰ প্ৰায় 200 লোক ৷ ইপিনে বৃদ্ধ আৰু বহু আদহীযা লোকৰ সৈতে শিবিৰটোত আশ্ৰয় লৈ আছে 60 টাকৈ কণ কণ শিশু ৷
জনীয়া সমষ্টিৰ বলাই পথাৰ গাঁৱতো ১৩৮৪ নং বলাইপথাৰ দ্বিতীয় খণ্ড প্ৰাথমিক বিদ্যালয়ত 34 টা পৰিয়ালৰ প্ৰায় 130 জন লোকে 50 টা শিশুৰে সৈতে এক কদৰ্যময় পৰিবেশত বাস কৰি আছে ৷ এই শিবিৰ সমূহৰো নাম নাই চৰকাৰী শিবিৰৰ তালিকাত ৷ এনেদৰে জিলাখনৰ বিভিন্ন প্ৰান্তত বহু চৰকাৰী বিদ্যালয়ত বানত আক্ৰান্ত লোকসকলে শিবিৰ পাতি আশ্ৰয় লৈ আছে যদিও বহু শিবিৰৰ নাম নাই চৰকাৰী শিবিৰৰ তালিতাত ৷ অৱশ্যে যদিও এইসমূহ শিবিৰ চৰকাৰীভাৱে স্বীকৃত নহয়,তথাপি শিবিৰত আশ্ৰয় লৈ থকা লোকসকলক চাউল,দাইল, নিমখ আদিকে ধৰি প্ৰয়োজনীয় বান সাহাৰ্য আৰু খাদ্য সামগ্ৰী যোগান ধৰা হৈছে এই শিবিৰসমূহত ৷