সূৰ্যৰ পৰাক্ৰমত ছেদেলি-ভেদেলি কিৱি বাহিনী, দহ অভাৰতেই সকলো শেষ

হায়দৰাবাদ:গুৱাহাটী মহানগৰীৰ বৰ্ষাপাৰা ষ্টেডিয়ামত অনুষ্ঠিত ভাৰত-নিউজীলেণ্ডৰ মাজৰ তৃতীয়খন টি-২০ ত ভাৰতৰ জয়লাভ ৷ এইখন মেচৰ বাবে ভাৰতে মূল একাদশত দুগৰাকী খেলুৱৈৰ সালসলনি কৰিছিল ৷ বিপৰীতে নিউজীলেণ্ডে এগৰাকী খেলুৱৈৰ সালসলনি কৰা দেখা গৈছিল ৷

মেচখনত নিউজীলেণ্ডৰ বিৰুদ্ধে আধিপত্য অব্যাহত ৰাখি জয়লাভ কৰে ভাৰতে । বিশেষকৈ অভিষেক শৰ্মা আৰু অধিনায়ক সূৰ্যকুমাৰ যাদৱৰ বিস্ফোৰক ইনিংছৰ বাবেই ভাৰতে তৃতীয়খন টি-২০ ত মাত্ৰ ১০ অভাৰতে নিউজীলেণ্ডে বান্ধি দিয়া ১৫৪ ৰাণৰ লক্ষ্যত উপনীত হয় ।

অভিষেক ২০ টা বলত অপৰাজিত ৬৮ ৰাণ সংগ্ৰহ কৰে, য’ত আছিল ৭ টা চাৰি আৰু ৫ টা ছয় ৷ আনহাতে অধিনায়ক সূৰ্যই ২৬ টা বলত ৬ টা চাৰি আৰু ৩ টা ছয়ৰে অপৰাজিত ৫৭ ৰাণ সংগ্ৰহ কৰে ৷

ইয়াৰ বাহিৰেও ঈশানে ১৩ টা বলত সংগ্ৰহ কৰে ২৮ ৰাণ । দৰ্শনীয়ভাৱে ভাৰতে ইনিংছৰ প্ৰথমটো বলতে হেৰুৱাই সঞ্জু চেমছনৰ উইকেট ।

চমৎকাৰ বলিং প্ৰদৰ্শনৰ বাবেই ভাৰতে প্ৰতিপক্ষক ৯ উইকেটৰ বিনিময়ত ১৫৫ ৰাণত সীমাবদ্ধ কৰি ৰাখিবলৈ সক্ষম হয় । এই খেলখনত যশপ্ৰীত বুমৰাহ আৰু ৰবি বিষ্ণৈয়ে ভাৰতীয় দলৰ উৎকৃষ্ট বলাৰ হিচাপে নিজকে পুনৰবাৰ প্ৰমাণিত কৰে ৷

ভাৰতে টছত জিকি প্ৰথমে বলিং কৰাৰ সিদ্ধান্ত গ্ৰহণ কৰে ৷ গ্লেন ফিলিপছ আৰু মাৰ্ক চেপমেনৰ বাহিৰে বাকীসকল বেটছমেনৰ বাবে ভাৰতীয় বলাৰসকল অত্যন্ত প্ৰত্যাহ্বানমূলক বুলি প্ৰমাণিত হয় ৷ ফিলিপছ-চেপমেনে চতুৰ্থ উইকেটৰ যুটিত ৪১ টা বলত ৫২ ৰাণ সংগ্ৰহ কৰে ।

বিষ্ণৈই আৰু বুমৰাহক ভাৰতীয় দলত স্থান দিয়াৰ লগে লগে দলটোৰ বলিং আক্ৰমণ অধিক শক্তিশালী হৈ উঠে আৰু দুয়োগৰাকী তাৰকা বলাৰে সুন্দৰ বলিং প্ৰদৰ্শন দাঙি ধৰে ৷ ফিলিপছৰ নিৰ্ণায়ক ইনিংছে অৱশেষত দলটোক ১৫০ ৰাণৰ সীমা পাৰ কৰোৱাত সহায় কৰে ৷ ফলত নিউজীলেণ্ডে ৯ উইকেটৰ বিনিময়ত ১৫৩ ৰাণত ইনিংছ সামৰে ৷

অধিনায়কে কি কয় ?

সূৰ্যকুমাৰ যাদৱ: আমি প্ৰথমে বলিং কৰিবলৈ বিচাৰিছো । উইকেট ভাল দেখা গৈছে । নিৰ্ভীক হওক, নিজৰ সিদ্ধান্ত নিজে লওক, মজা কৰক আৰু নম্ৰ হৈ থাকক । দলত দুটাকৈ পৰিৱৰ্তন ঘটোৱা হৈছে । অৰ্শদীপ আৰু বৰুণক জিৰণি দিয়া হৈছে ৷ তাৰ স্থানত দলত অন্তৰ্ভুক্ত কৰা হৈছে বুমৰাহ আৰু বিষ্ণৈইক ৷