কেজৰিৱালৰ দলত এতিয়া চোৰেই চোৰ ! ৰাঘৱ চাড্ডাৰ দলত্যাগৰ ঘোষণাৰ পিছত মন্ত্ৰী কপিল মিশ্ৰৰ কটাক্ষ

নতুন দিল্লী:তীব্ৰ ৰাজনৈতিক সংকটৰ সন্মুখীন আম আদমি পাৰ্টী ৷ দলটোৰ আগশাৰীৰ সাতগৰাকীকৈ সাংসদে দলত্যাগ কৰাৰ ঘোষণাৰ পিছতে এই সংকটৰ সন্মুখীন হয় ৷ আপৰ সাতগৰাকীকৈ সাংসদৰ দলত্যাগক লৈ বিভিন্নজনে প্ৰতিক্ৰিয়া প্ৰকাশ কৰিবলৈ আৰম্ভ কৰিছে ৷

শুকুৰবাৰে ৰাঘৱ চাড্ডাই আন ৭ গৰাকী সাংসদৰ সৈতে বিজেপিত যোগদান কৰাৰ কথা ঘোষণা কৰি সকলোকে হতবাক কৰি তুলিছিল । চাড্ডাই সংবাদমেলত কৈছিল, ‘‘আমি সিদ্ধান্ত লৈছো যে আমি ৰাজ্যসভাত আম আদমি পাৰ্টীৰ দুই-তৃতীয়াংশ সদস্যই ভাৰতীয় সংবিধানৰ নীতি ব্যৱহাৰ কৰি বিজেপিৰ সৈতে একত্ৰিত হ’ম ।’’ এই খবৰে ৰাজনৈতিক মহলত আলোড়নৰ সৃষ্টি কৰিলে ।

উল্লেখ্য যে, বিগত কিছুদিনৰে পাৰ ৰাঘৱ চাড্ডাই বিজেপিত যোগদান কৰাৰ সন্দৰ্ভত জল্পনা-কল্পনা চলি আছিল । সংবাদমেলত ৰাঘৱ চাড্ডাৰ বিজেপি গমনৰ সিদ্ধান্ত ৰাজহুৱা হোৱাৰ পিছত প্ৰতিক্ৰিয়া ব্যক্ত কৰিছে মন্ত্ৰী কপিল মিশ্ৰই ৷

ৰাঘৱ চাড্ডাৰ এই সিদ্ধান্তক লৈ মন্ত্ৰী কপিল মিশ্ৰই এক্সত এটা পোষ্ট প্ৰকাশ কৰে ৷ পোষ্টটো এনেধৰণৰ - ‘‘কেজৰিৱালৰ গেঙত কেৱল চোৰ আৰু দুৰ্নীতিগ্ৰস্ত লোকহে বাকী আছে । এতিয়াও জীৱিত আত্মা থকা কোনো ব্যক্তিয়ে তাত বেছি দিন থাকিব নোৱাৰে । ৰাঘৱ ভাই, সন্দীপ পাঠক, অশোক মিট্টল আৰু আন সকলো সহকৰ্মীৰ সিদ্ধান্ত সাহসী আৰু প্ৰশংসনীয় । ই পঞ্জাবৰ জনসাধাৰণক কেজৰিৱালৰ লুটপাতৰ পৰা ৰক্ষা কৰাত নিৰ্ণায়ক বুলি প্ৰমাণিত হ'ব ।’’