کولکاتا: مغربی بنگال کی وزیراعلیٰ ممتا بنرجی کے بھتیجے ابھیشیک بنرجی صبح 11 بجے کے بعد سالٹ لیک کے سی جی او کمپلیکس پہنچے۔ذرائع نے بتایا کہ وہاں سے وہ سیدھے چھٹی منزل پر ای ڈی حکام کے پاس گئے۔
واضح رہے کہ آج ہی نئی دہلی میں اپوزیشن اتحاد 'انڈیا' کی رابطہ کمیٹی کی میٹنگ ہے اور ابھیشیک بنرجی انڈیا گروپ کی رابطہ کمیٹی کے رکن ہیں۔ انہوں نے اتوار کو کہا کہ ای ڈی کے نوٹس کے تحت انہیں 13 ستمبر کو ایجنسی کے سامنے پیش ہونا پڑے گا۔
ابھیشیک بنرجی نے ' ایکس' پر پوسٹ کیاکوآرڈینیشن کمیشن آف انڈیا کی پہلی میٹنگ 13 ستمبر کو دہلی میں ہو رہی ہے، جہاں میں ایک ممبر ہوں۔ لیکن انفورسمنٹ ڈائریکٹوریٹ نے مجھے اسی دن ان کے سامنے پیش ہونے کا نوٹس بھیجا ہے۔
کلکتہ ہائی کورٹ کے حکم کے بعدای ڈی مبینہ اساتذہ بھرتی گھوٹالہ کی جانچ کر رہی ہے، جہاں اہل امیدواروں کو نوکریوں سے محروم کر دیا گیا تھا اور "نااہل" امیدواروں کو نقد رقم دے کر مقرر کیا گیا تھا۔
یہ بھی پڑھیں:Nusrat Jahan At ED ترنمول کانگریس کی رکن پارلیمان نصرت جہاں انفورسمنٹ ڈائریکٹوریٹ دفتر میں حاضر
یہ پہلا موقع نہیں ہے جب مرکزی ایجنسیوں نے بھرتی گھوٹالہ کے سلسلے میں کسی ٹی ایم سی لیڈر کو طلب کیا ہو۔ای ڈی اور سنٹرل بیورو آف انویسٹی گیشن (سی بی آئی) دونوں نے ابھیشیک بنرجی کو سمن جاری کیا ہے۔حکمران جماعت نے بدھ کو اپنے میڈیا سیل میں ابھیشیک بنرجی کے حوالے سے کہا کہ بی جے پی مرکزی ایجنسیوں کو میرے خلاف لڑنے کے لیے استعمال کرتی ہے۔ میرے خلاف سی بی آئی اور ای ڈی کا استعمال کرتے ہوئے اس طرح کی دھمکیاں مجھے عوامی خدمات یا عوام تک پہنچنے سے نہیں روک سکیں گی۔
