مغربی بنگال کا محمڈن اسپورٹنگ Mohammedan Sporting کی آئی لیگ 22-2021 سیزن میں توقع کے مطابق مہم کی شروعات کے لئے کڑی تیاری جاری ہے۔ دارالحکومت کولکاتا سے متصل شمالی 24 پرگنہ کے بدھان نگر میں واقع سالٹ لیک اسٹیڈیم میں محمڈن اسپورٹنگ اور گینٹ یونائٹیڈ فٹبال اکادمی کے درمیان نمائشی میچ کھیلا گیا۔
غیر ملکی فٹبالر مارکوس جوزف کی شاندار ہیٹ ٹرک کی بدولت محمڈن اسپورٹنگ نے نمائشی میچ میں گینٹ یونائٹیڈ فٹبال اکادمی کو یکطرفہ مقابلے میں 0-8 گول سے شکست دے دی۔
محمڈن اسپورٹنگ نے شاندار کھیل کا مظاہرہ کرتے ہوئے پہلے ہی ہاف میں مارکوس جوزف کی شاندار ہیٹ ٹرک، رودویوک اور برنڈن کے ایک ایک گول کی بدولت 0-5 کی سبقت حاصل کر لی۔
دوسرے ہاف میں بھی محمڈن اسپورٹنگ کی جانب سے شاندار کارکردگی کا مظاہرہ جاری رہا۔ محمڈن اسپورٹنگ کا یہ پانچواں پریکٹس میچ ہے, جس میں نصف درجن سے زائد گول سے جیت حاصل ہوئی۔
محمڈن اسپورٹنگ کے کپتان شیخ فیصل نے کہا کہ آئی لیگ سے قبل یکے بعد دیگرے پریکٹس میچوں میں کامیابی حاصل ہونے سے حوصلہ بلند ہوا ہے۔ انہوں نے کہا کہ آئی لیگ میں ہماری ٹیم کی کارکردگی توقع کے مطابق ہوگی، ٹیم میں شامل تمام کھلاڑی پرجوش ہیں۔
