اترپردیش کے گریٹر نوئیڈا کی ایسکورٹ کالونی میں پولیس کے مطابق ایک ریٹائرڈ پولیس انسپکٹر نے مبینہ طور پر اپنے بیٹے پر گولی چلانے کے بعد خود کو گولی مار کر ہلاک کیا۔
پولیس نے بدھ کے روز بتایا کہ ریٹائرڈ پولیس انسپکٹر کے بیٹے کو سینے اور ٹانگ میں گولی لگنے کے بعد زخمی حالت میں اسپتال میں داخل کرایا گیا۔ ان کی حالت تشویشناک بتائی جاتی ہے۔
پولیس کے مطابق یہ واقعہ دادری پولیس اسٹیشن حدود کے تحت ریلوے روڈ کے قریب پیش آیا جس سے علاقے میں خوف و ہراس پھیل گیا۔
ابتدائی تفتیش میں انکشاف ہوا ہے کہ باپ بیٹا کے درمیان خاندانی معاملہ تھا اور دونوں کے مابین جھگڑا ہو گیا اور بدھ کے روز اس جھگڑے نے دوسرا رخ لیا کہ پولیس افسر نے اپنے بیٹے پر فائرنگ کر دی۔
ایڈیشنل ڈپٹی کمشنر پولیس، گریٹر نوئیڈا وشال پانڈے نے نامہ نگاروں کو بتایا کہ 'ہمیں مذکورہ انسپکٹر کے پڑوسی کی جانب سے بتایا جارہا ہے کہ ریٹائرڈ پولیس اہلکار شراب کا عادی تھا۔ ان کے مابین اکثر بحث ہوتی رہتی تھی۔ اس نے پہلے اپنے بیٹے کو اپنے لائسنس شدہ ریوالور سے گولی مار دی پھر خود کو گولی مار دی اور موقع پر ہی دم توڑ گیا۔ بیٹا اسپتال میں داخل ہے جہاں اس کا علاج چل رہا ہے۔'
پانڈے نے مزید کہا کہ 'ہم نے لاش کو پوسٹ مارٹم کے لئے بھیج دیا ہے اور معاملے کی تفتیش کی جارہی ہے۔ ابھی کچھ بھی تبصرہ کرنا جلدبازی ہے۔ تفصیلی تحقیقات سے حقیقت سامنے آجائے گی۔'
پولیس نے بتایا کہ مزید تفتیش جاری ہے۔
