اترپردیش کے شہر بنارس میں موجود تاریخی عمارتوں اور مقامات کی ایک لمبی فہرست ہے، اسی میں سے للا پورہ علاقے میں واقع پانچ گنبدوں والی مسجد بھی ہے جس کا شمار بنارس کی اکلوتی منفرد مسجد کے طور پر ہوتا ہے۔
یہ مسجد قدیم دور کی تعمیر کی اعلی شاہکار ہے جس میں ایک محراب، پانچ گنبد، وسیع صحن اور خوبصورت دروازے ہیں۔
مسجد میں زیادہ تر لال پتھر کا استعمال ہوا ہے۔ موٹی موٹی دیواریں اور دونوں جانب دو حجرے بھی ہیں۔ صحن میں وضو کے لیے کنواں ہے جس سے پانی نکال کر آج بھی استعمال کیا جاتا ہے۔
علاقائی رہائشی محمد صادق بتاتے ہیں کہ اس مسجد کے بارے میں کوئی پختہ تاریخ نہیں ملتی ہے تاہم کہا جاتا ہے کہ قدیم زمانے کی تعمیر کردہ یہ مسجد ہے اور بنارس کی واحد مسجد ہے جس کے پانچ خوبصورت ترین گنبد ہیں۔
لوگ بتاتے ہیں کہ تین یا دو گنبد کی مسجدیں ہر جگہ مل جائیں گی لیکن اس مسجد کی خصوصیات یہ ہے کہ اس پر پانچ گنبد تعمیر کیا گیا ہے۔ یہی وجہ ہے کہ دور دراز علاقوں سے لوگ اسے دیکھنے آتے ہیں۔
یہ بھی پڑھیں: متھرا شاہی عید گاہ کمیٹی کے معاملے پر سکریٹری نے کیا کہا؟
مقامی رہائشی شکیل احمد جادوگر بتاتے ہیں کہ ماضی میں معروف ٹی وی پروگرام کے بی سی میں بالی وڈ اداکار امیتابھ بچن کے ذریعے سوال پوچھا گیا تھا کہ پانچ گنبد والی مسجد کہاں ہے؟ جس پر کئی لاکھ کا انعام بھی تھا۔ اس کے جواب میں بتایا گیا تھا کہ بنارس کے للا پورہ کے علاقے میں پانچ گنبدوں والی مسجد واقع ہے۔ اس کے بعد سے یہ مسجد سرخیوں میں رہی اور لوگوں کی دلچسپی کا باعث اب بھی بنی ہوئی ہے۔
