کلدیپ سینگر انّاؤ ضلع کے بنگارمئو سیٹ سے بی جے پی کے رکن اسمبلی ہیں اور انّاؤ کے سرخیوں میں رہنے والے ریپ کیس کے کلیدی ملزم ہیں۔
کلدیپ سینگر سے ملاقات کے بعد میڈیا سے بات چیت کے دوران ساکشی مہاراج نے کہا کہ 'ہمارے یہاں کے بہت ہی کامیاب اور پسندیدہ رکن اسمبلی کلدیپ سنگھ سینگر جی کافی روز سے یہاں ہیں۔ انتخابات کے بعد ان کا شکریہ ادا کرنا مناسب سمجھا تو ملنے آ گیا۔'
ساکشی مہاراج کی یہ ملاقات اس لیے اتنی سرخیاں بٹور رہی ہیں کیونکہ سال بھر پہلے انّاؤ کا وہ مبینہ ریپ کیس ملک اور بیرون ممالک میں کافی چرچہ میں رہا جس میں کلیدی ملزم کلدیپ سنگھ سینگر ہیں۔
متاثرہ نابالغ لڑکی نے الزام عائد کیا تھا کہ رکن اسمبلی کلدیپ سینگر نے اپنے گھر پر اس وقت اس کے ساتھ ریپ کیا تھا جب وہ اپنے ایک رشتے دار کے ساتھ ان کے گھر پر نوکری مانگنے گئی تھیں۔