عیدالاضحیٰ کی نماز ایک بار پھر کورونا وائرس کے سائے میں ادا کی جائے گی ایسے میں حکومت نے گائیڈ لائنز جاری کر کے کورونا سے بچنے کی تاکید کی ہے اور مساجد یا عیدگاہ میں بیک وقت 50 افراد کو ہی نماز ادا کرنے کی اجازت دی ہے۔
آل انڈیا مسلم پرسنل لا بورڈ کے رکن مولانا خالد رشید فرنگی محلی نے اپیل کی ہے کہ عیدالاضحیٰ کی نماز کے دوران بھی کورونا گائیڈ لائن پر عمل کریں۔
مولانا خالد رشید فرنگی محلی نے ای ٹی وی بھارت سے گفتگو کے دوران بتایا کہ 'حکومت نے عید الاضحیٰ کی نماز کے تعلق سے جو گائیڈ لائنز جاری کی ہے اس پر سبھی افراد عمل کریں۔ مساجد یا عیدگاہ میں 50 سے زائد افراد ایک ساتھ نماز ادا نہ کریں اور جو بھی مساجد عید گاہ میں نماز ادا کرنے جائے وہ ماسک اور سینیٹائزر کا استعمال ضرور کرے۔
انہوں نے کہا کہ کہ قربانی کرتے وقت اس بات کو یقینی بنائیں کہ عوامی گزرگاہ یا عوامی جگہ پر قربانی نہ کریں اور حکومتی گائیڈ لائنز کے مطابق ہی قربانی کریں۔
قربانی کرنے کے بعد جانوروں کے خون کو نالیوں میں نہ بہائیں اور نہ ہی کسی قسم کی فضلات روڈ پر یا نالیوں میں پھینکیں کہ جس سے عوام کو پریشانی ہو۔
مولانا کالد رشید نے مزید کہا کہ 'جو افراد مسجد عیدگاہ میں نماز نہیں ادا کر پا رہے ہیں وہ اپنے گھروں میں ہی چار افراد کے ساتھ جماعت کے ساتھ نماز عید الاضحیٰ ادا کریں اور اگر چار افراد گھر میں نہیں ہیں تو چار رکعت اشراق کی نماز ادا کریں اس سے بھی عیدالاضحیٰ کی نماز کا ثواب حاصل ہوگا۔
انہوں نے کہا کہ اگر عیدگاہ انتظامیہ کو اس بات کا خدشہ ہے کہ عیدگاہ میں نماز ادا کریں گے تو بھیڑ ہوگی تو ایسے میں انتظامیہ کو چاہیے کی مسجد ہی میں نماز ادا کریں جس سے کورونا گائیڈ لائن کی خلاف ورزی نہ ہو۔
