لکھنؤ: مجلس علمائے ہند کے تمام اراکین نے پیغمبر اسلامﷺ کی شان اقدس میں گستاخی کے مسلسل عمل کی مذمت کرتے ہوئے حکومت ہند سے شرپسندوں کے خلاف سخت قانونی کارروائی کرنے کا مطالبہ کیا ہے۔ علماء نے کہا کہ مسلمان ہر مذہب اور اس کے مقدسات کا احترام کرتے ہیں۔ مسلمان علماء کی طرف سے کبھی ایسا بیان نہیں دیا گیا جس سے کسی دوسرے مذہب اور اس کی مقدس شخصیات کی اہانت کی گئی ہو۔ اس لیے دوسرے مذاہب کے افراد کو بھی مسلمانوں کے مذہبی جذبات کا احترام کرنا چاہیے۔Prophet Remark Row
مسلمان پیغمبر اسلامﷺ کو اپنی جان سے زیادہ عزیز رکھتے ہیں۔ اس لئے ان کے مذہبی جذبات کا احترام ہر مذہب اور فرقہ کے افراد پر لازم ہے۔ ایسے بیانات ملک کی رسوائی اور عالمی بدنامی کا سبب ہیں۔ جن پر قابو پانا چاہیے۔ علماء نے حیدرآباد کے انسانیت دوست عوام سے امن برقرار رکھنے کی اپیل بھی کی۔
مجلس علمائے ہند کے جنرل سکریٹری امام جمعہ مولانا سید کلب جواد نقوی نے حکومت ہند سے توہین مذہب معاملہ میں سخت قدم اٹھانے کا مطالبہ کرتے ہوئے مذہبی رواداری برقرار رکھنے کی اپیل کی۔ مولانانے اپنے بیان میں کہا کہ کچھ شرپسند چاہتے ہیں کہ بھارت کی جمہوری قدروں اور مذہبی رواداری کو ختم کردیا جائے۔ ایسے افراد ہر جگہ موجود ہیں جو مذہبی جذبات کو مشتعل کرکے ملک کی فرقہ وارانہ یکجہتی کو نقصان پہونچانا چاہتے ہیں۔
مولانا نے کہاکہ بعض لوگ صرف ذاتی تشہیر اور سیاسی مفاد حاصل کرنے کے لیے ایسا کر رہے ہیں۔ اگر حکومت ہند نے توہین مذہب کے خلاف اور مذہبی مقدس شخصیات کےاحترام کے لئے سخت قانون سازی نہیں کی تو اس کے نقصانات دیرپا ہوں گے ۔مولانانے کہاکہ اس سے پہلے نپور شرما کے بیان سے ملک نے کتنا نقصان اٹھایایہ دنیا جانتی ہے اور اس کے بعد اب حیدرآباد کی سرزمین سے پیغمبر اسلام کی اہانت کی کوشش کی گئی ہے ،جو انتہائی مذموم حرکت ہے۔ مولانانےکہا کہ بی جے پی نے راجہ سنگھ کو پارٹی سے معطل کرکے وقت پر مناسب کارروائی کی ہے۔ لیکن ایسے افراد کے خلاف سخت قانونی کارروائی بھی ضروری ہے تاکہ ہمیشہ کے لیے اس کا سدّ باب ہوسکے۔
مجلس علمائے ہند کے اراکین من جملہ مولانا سید حسین مہدی حسینی ممبئی، صدر مجلس علمائے ہند، مولانا سید محمدمحسن نقوی امام جمعہ شیعہ جامع مسجد دہلی، مولانا نثار احمد زین پوری، مولانا تقی آغا حیدرآباد، مولانا غلام مہدی خان چنئی، مولانا کرامت حسین جعفری کشمیر،مولانا محمد حسین لطفی کرگل، مولانا صفدر حسین جونپوری، مولانا رضاحسین رضوی، مولانا تسنیم مہدی زید پوری، مولانا تقی حیدر نقوی، مولانا سید رضا حیدر زیدی، مولانا سید غلام رضا جعفری، مولانا عابد عباس دہلی، مولانا میر اظہر علی عابدی کرناٹک ممبر وقف بورڈ کرناٹک،مولانا امانت حسین بہار،مولانا شبیب کاظم مظفر پور،مولانا مہر عباس رضوی کلکتہ بنگال،اور دیگر اراکین مجلس علمائے ہند نے ٹی راجہ سنگھ کے بیان کی مذمت کرتے ہوئے اس کے خلاف سخت قانونی کارروائی کرنے کا مطالبہ کیا۔
یہ بھی پڑھیں: Prophet Muhammad Remarks Row مولانا توقیر رضا نے راجہ سنگھ کے خلاف سخت کاروائی کا مطالبہ کیا
