مظفرنگر: جمعیۃ علماء ضلع مظفر نگر کے ذمہ داران و عہدداران پر مشتمل ایک وفد نے ڈسٹرکٹ مجسٹریٹ سے ملاقات کی اور لاؤڈاسپیکر معاملہ پر انہیں ایک میمورنڈم پیش کیا۔ ڈسٹرکٹ مجسٹریٹ کو دیئے گئے میمورنڈم میں مساجد سے لاؤاسپیکر کو ہٹانے کا معاملہ پر احتجاج کیا گیا اور کہا گیا کہ مظفر نگر کی مساجد میں اذان کے لئے لگائے گئے لاؤڈاسپیکر کو سپریم کورٹ کی جانب سے دی گئی گائیڈ لائن کے مطابق استعمال کیا جارہا ہے، اس کے باوجود مختلف علاقوں کی مساجد سے پولیس نے لاؤڈساپیکر کو ہٹادیا ہے۔
جمعیۃ علماء کے وفد نے پولیس کے رویہ پر سوال اٹھائے اور زبردستی لاؤاسپیکر نکالنے پر اعتراض جتایا۔ میمورنڈم میں بتایا گیا کہ مساجد میں لاؤڈاسپیکر سپریم کورٹ کی گائیڈ لائن کے مطابق استعمال کئے جارہے ہیں۔ اس لئے مساجد کے ائمہ و ذمہ داران کو پریشان نہ کیا جائے۔ ضلع کمیٹی کے کنوینر مولانا مکرم قاسمی نے زبردستی مساجد سے لاؤڈاسپیکر ہٹانے کی مذمت کی اور اس طرح کی کاروائی کرنے والے پولیس عہدیداروں کے خلاف مناسب کاروائی کا مطالبہ کیا۔
یہ بھی پڑھیں: اے ایس آئی نے گیان واپی سروے پر رپورٹ سونپنے کے لئے مزید وقت مانگا
وفد میں مولانا مکرم علی قاسمی کنوینر جمعیۃ علماء مظفر نگر کے علاوہ مولانا مدثر قاسمی، حافظ شیر دین، حاجی عزیز الرحمن، مفتی مجیب الرحمن قاسمی، مفتی دانش قاسمی، قاری فرقان، مولانا مونس محمد اکرام، مولانا سہیل و دیگر شامل تھے۔
