مظفر نگر: ملک کی آزادی سے لے کر اب تک جمعیۃ علماء ہند نے جو قربانیاں دی ہیں وہ کسی سے ڈھکی چھپی نہیں اور آج ملک میں جو ماحول خراب کیا جا رہا ہے اور فرقہ وارانہ کشیدگی پیدا کی جا رہی ہے وہ ملک کے مفاد میں نہیں ہے۔ جمعیۃ علماء ہند کے قومی صدر مولانا سید ارشد مدنی نے ’’مدنی میموریل پبلک اسکول‘‘ میں جمعیۃ علماء ہند کے زیر اہتمام مجلس منتظمہ (جنرل باڈی) کے سرگرم کارکنوں کی کانفرنس سے خطاب کیا۔ مجلس منتظمہ (جنرل باڈی) کے اجلاس (کانفرنس) میں مغربی اتر پردیش کے 17 اضلاع بشمول مرادآباد، علی گڑھ، میرٹھ، باغپت، مظفر نگر، شاملی، سہارنپور، بجنور، ہاپوڑ، غازی آباد اور بلند شہر وغیرہ کے عہدیداروں اور ریاست اترپردیش کے تقریباً 1500 فعال کارکنان نے شرکت کی اور جمعیۃ علماء ہند کی طرف سے اس کانفرنس میں تربیت حاصل کی۔ اجلاس میں تنظیم کی مضبوطی پر تفصیلی تبادلہ خیال کیا گیا۔
یہ بھی پڑھیں:
Media trial میڈیا ٹرائل پر سپریم کورٹ کے حکم کو ہم قدر کی نگاہ سے دیکھتے ہیں: جمعیۃ علماء ہند
فرقہ وارانہ ماحول کو تبدیل کر کے اچھے ماحول کے قیام میں مدد کرنے اور آٹھویں جماعت کے بعد لڑکیوں کے لیے الگ تعلیمی ادارے کھولنے کے علاوہ ووٹر بیداری مہم چلانے کے ساتھ ساتھ ووٹر لسٹ میں نئے ناموں کا اضافہ کرنے جیسے مسائل پر سنجیدگی سے غور و خوض کیا گیا اور مختلف قراردادیں کو کانفرنس میں متفقہ طور پر منظور کیا گیا۔ کانفرنس کی صدارت کرتے ہوئے صوبائی صدر مولانا سید اشہد رشیدی نے کہا کہ میں جمعیۃ علماء کے کارکنان سے کہنا چاہتا ہوں کہ آپ کی وابستگی ایسی تنظیم سے ہے جس کے آباؤ اجداد نے ملک کی آزادی کے لیے بے پناہ مشکلات کا سامنا کیا اور ملک کو آزادی دلائی۔ انہوں نے کہا کہ جمعیۃ علماء ہند کے قیام کا بنیادی مقصد قوم کی خدمت اور اسلامی اقدار کا تحفظ ہے۔ انہوں نے کہا کہ جمیعۃ علماء ہند اسے جمہوریت کی مضبوطی کے لیے بالکل ضروری سمجھتی ہے۔ جمعیۃ علماء ہند نے 8 نکاتی پروگراموں کا خاکہ تیار کیا اور ضلعی عہدیداروں کو اپنے متعلقہ اضلاع میں 8 نکات پر خصوصی کام کرنے کی ہدایت دی۔
کانفرنس کے مہمان خصوصی جمعیۃ علماء ہند کے سربراہ مولانا ارشد مدنی نے کہا کہ میں ہر ایک سے کہتا ہوں کہ جہاں بھی رہیں محبت پھیلائیں۔ انہوں نے کہا کہ آج ملک کو فرقہ پرست طاقتیں آگ لگا رہی ہیں جو تقسیم کرنے پر تلی ہوئی ہیں۔ معاشرہ ان سے ہوشیار رہنا بہت ضروری ہے۔ مولانا مدنی نے کہا کہ فرقہ پرست طاقتوں کی طرف سے نفرت کے نعرے لگانا ملک کے خلاف ہے۔ تقسیم کا ذکر کرتے ہوئے مولانا ارشد مدنی نے کہا کہ ہمارا ملک فرقہ پرستی کی وجہ سے ٹوٹا ہے اور اگر فرقہ پرستی بڑھے گی تو ملک کو نقصان ہوگا۔ مولانا مدنی نے کہا کہ جمیعۃ علماء جمہوریت اور سیکولر آئین کی مضبوطی کے سلسلے میں میدان میں ہے۔ مولانا مدنی نے فلسطین میں بمباری کی شدید مخالفت کرتے ہوئے کہا کہ ہزاروں بچے، خواتین اور نوجوان شہید ہوچکے ہیں، انہوں نے کہا کہ فلسطین کے شہری اپنی آزادی کی جنگ لڑ رہے ہیں، جب کہ اسرائیل حملہ آور ہے۔ اسرائیل نے فلسطین میں ہزاروں بے گناہ لوگوں کو قتل کیا ہے اور امریکہ اس کے ساتھ کھڑا ہے جو کہ انتہائی قابل مذمت ہے۔
مولانا ارشد مدنی نے لڑکیوں کی تعلیم کے لیے الگ اسکول قائم کرنے کی اپیل کرتے ہوئے کہا کہ لڑکیوں کو مذہب کی تبدیلی کا نشانہ بنایا جاتا ہے جس کی وجہ سے خاندان برباد ہو جاتے ہیں۔ انہوں نے کہا کہ جمعیۃ علماء اسی مشن پر کام کر رہی ہے۔ کانفرنس میں مولانا کعب رشیدی نے کہا کہ ہندوستان کی جمہوریت ہر ایک کو اپنے مذہب کے مطابق زندگی گزارنے کی آزادی دیتی ہے۔ انہوں نے مدارس کی کامیابیوں پر تفصیل سے روشنی ڈالی۔ مفتی اشفاق اعظمی نے کانفرنس کی نظامت کی اور کانفرنس کا منشور جاری کیا۔ اس دوران مولانا سید اظہر مدنی، مولانا حبیب اللہ مدنی اور حافظ عبدالقدوس ہادی نے بھی خطاب کیا۔ اس موقع پر مغربی اترپردیش کے 17 اضلاع سے جمعیۃ علماء ہند کے ارکان نے کانفرنس میں شرکت کی، کانفرنس میں مختلف تجاویز کو منظوری دی گئی۔
