بارہ بنکی: ریاست اترپردیش کے ضلع بارہ بنکی میں قتل کا ایک دل دہلا دینے والا معاملہ سامنے آیا ہے۔ جہاں بھائی نے اپنی سگی بہن کا سر قلم کر دیا۔ اس کے بعد وہ کٹے ہوئے سر کو ہاتھ میں لے کر پولیس اسٹیشن بھی روانہ ہوگیا۔ کٹے ہوئے سر سے خون ٹپک رہا تھا، گاؤں والے یہ خوفناک منظر دیکھ کر حیران رہ گئے۔ گاؤں والوں نے پولیس کو اس کی اطلاع دی، جس کے بعد پولیس نے نوجوان کو بیچ راستے سے گرفتار کر لیا اور اسلحہ بھی برآمد کیا۔
ایڈیشنل ایس پی آشوتوش مشرا نے بتایا کہ یہ واقعہ فتح پور تھانہ علاقہ کے مٹھواڑہ گاؤں میں پیش آیا۔ جمعہ کے روز ریاض کی اپنی سگی بہن سے جھگڑا ہوا۔ اس کے بعد ریاض کہیں چلا گیا اور جب وہ کچھ دیر بعد واپس آیا تو اس نے بہن کو کپڑے دھونے کو کہا، اس کے بعد بہن کپڑے دھونے کے لیے پانی بھر رہی تھی کہ اسی دوران ریاض نے بہن پر کا سر قلم کر دیا۔
واقعہ کی اصل وجہ یہ ہے: ریاض کی بہن 25 مئی سے غائب تھی، رپورٹ کے مطابق اس دوران گاؤں کا ہی ایک نوجوان چاند بابو ولد جان محمد اسے لیکر فرار ہوگیا تھا۔ کئی دنوں تک بہن کے واپس نہ آنے پر والد نے 29 مئی کو فتح پور کوتوالی میں چاند بابو سمیت پانچ کے خلاف مقدمہ درج کرایا تھا۔ جس کے بعد پولیس نے ریاض کی بہن کو بازیاب کرایا اور چاند بابو کو جیل بھیج دیا، اس وقت وہ جیل میں ہی ہے۔ پولیس کے مطابق ریاض بہن کے اس فعل سے ناراض تھا، اس بات پر دونوں کے درمیان جھگڑا بھی ہوا کرتا تھا۔ ریاض کو لگا کہ اس کی بہن کی اس حرکت سے اس کی توہین ہوئی ہے۔ جس کی وجہ سے اس نے اپنی بہن کو قتل کر دیا۔
یہ بھی پڑھیں:
پڑوسیوں کے مطابق ریاض نے منصوبہ بندی کے بعد واردات کو انجام دیا۔ اس کے گھر میں والدین کے علاوہ اور بھی بہن بھائی ہیں۔ ایسے میں گھر کے اندر مارنا مشکل تھا اس لیے اس نے بہن کو کپڑے دھونے کے لیے گھر سے باہر بھیج دیا۔ ریاض مجرمانہ فعل پہلے بھی کرتا رہا ہے۔ وہ گاؤں میں سبزی کا اسٹال لگاتا ہے۔ اسے مارپیٹ کے ایک مقدمے میں جیل بھی بھیج دیا گیا تھا لیکن وہ 15 دن پہلے جیل سے باہر آیا تھا۔
