اجرت میں اضافہ کا مطالبہ کرتے ہوئے تلگو فلم انڈسٹری کے ورکرز نے احتجاج کیا۔حیدرآباد کے علاقہ جوبلی ہلز میں واقع فلم فیڈریشن کے دفتر کے باہر ان ورکرز نے احتجاج کیا۔اس احتجاج میں مختلف یونینوں کے ارکان نے بڑی تعداد میں حصہ لیا۔اس موقع پر ان ورکرز نے میڈیا سے بات کرتے ہوئے چار سال سے اجرتوں میں اضافہ نہ کئے جانے پر شدید برہمی کااظہار کیا۔انہوں نے کہاکہ اجرتوں میں اضافہ نہ کئے جانے کی وجہ سے ان کو کئی معاشی مسائل کا سامنا کرناپڑرہا ہے۔انہوں نے نشاندہی کرتے ہوئے کہاکہ مکان کے کرائے، ضروری اشیا کی قیمتوں میں اضافہ ہوا ہے تاہم ان کی اجرتوں میں کوئی اضافہ نہیں کیاگیا ہے۔یہ کہتے ہوئے کہ وہ کم اجرت کی وجہ سے اپنے بچوں کی اسکول فیس بھی دینے کے موقف بھی نہیں ہیں، انہوں نے ان کے مطالبہ کو فوری قبول کرنے پرزوردیتے ہوئے نعرہ بازی کی۔بڑی تعداد میں ورکرز کے احتجاج کے پیش نظر پولیس کی بھاری تعداد کو وہاں تعینات کردیاگیا تھا۔اس احتجاج میں فلم سازی کے 14شعبوں سے وابستہ ورکرز نے حصہ لیاجنہوں نے فلم شوٹنگس سے دوری اختیار کرنے کا بھی فیصلہ کیا۔یہ ورکرس پروڈیوسرس سے مطالبہ کررہے ہیں کہ ان کے لئے مناسب اجرتوں کو فراہم کرنے کو یقینی بنایاجائے تاہم ان کا کہنا ہے کہ ان کے مسائل کو نظرانداز کیاجارہا ہے۔ان ورکرز کے ہڑتال کے لئے قواعد کے مطابق پیشگی فلم چیمبر کو نوٹس دینی ہوتی ہے تاہم فلم چیمبر کے صدر کے راما کرشنا نے کہا کہ ان ورکرز کی طرف سے ان کو کوئی نوٹس نہیں ملی ہے۔ Telugu Film Industry Workers Protest
یواین آئی
