حیدرآباد: زیر جامہ چھپا کر لائے گئے سونے کو شہر حیدرآباد کے شمس آباد ایرپورٹ پر کسٹم کے عہدیداروں نے دبئی سے حیدرآباد پہنچے ایک مسافر کے پاس سے ضبط کیا۔ یہ مسافر کل شب فلائٹ نمبر Ek528کے ذریعہ تلنگانہ کے دارالحکومت پہنچا تھا۔ اس کے پاس سے 823 گرام سونا جو دو پیاکٹس میں لایا گیا تھا ضبط کیا گیا۔ اس سونے کی مالیت 47 لاکھ روپئے بتائی جا رہی ہے۔ پرانا شہر سے تعلق رکھنے والے اس مسافر سے کسٹم کے عہدیدار اس ضبط سونے کے بارے میں پوچھ گچھ کر رہے ہیں۔ ایر انٹلی جنس یونٹ حیدرآباد کسٹم نے ایک اطلاع پر یہ کارروائی کی۔ کسٹم کے عہدیدار اس معاملہ کی جانچ کر رہے ہیں۔
یہ بھی پڑھیں: Gold Seized at Shamsabad Airport: شمس آباد ایرپورٹ پر 3.50 کروڑمالیت کا سونا ضبط
واضح رہے کہ جنوبی ہند کے اس سرکردہ ایرپورٹ پر حالیہ دنوں کے دوران سونے کی اسمگلنگ کے واقعات میں اضافہ ہوا تاہم کسٹم کے عہدیداروں کی چوکسی کے سبب بڑے پیمانہ پر سونے کی ضبطی کی جارہی ہے۔ گزشتہ 23 فروری کو حیدر آباد کے راجیو گاندھی بین الاقوامی ہوائی اڈے (آر جی آئی اے) پر 7 کروڑ روپے کا سونا ضبط کیا گیا۔ یہ سونا چار غیر ملکی مسافروں سے ضبط کیا گیا، جو شارجہ کے راستے حیدرآباد پہنچے تھے۔ کسٹمز ڈیپارٹمنٹ کے ایئر انٹیلی جنس افسران نے اس معاملے میں چار سوڈانی شہریوں کو گرفتار کیا۔ مزید کارروائی کرتے ہوئے اس سے پوچھ گچھ کی جارہی ہے۔ اس سے قبل منگلورو انٹرنیشنل ایئرپورٹ (MIA) پر ایک مسافر سے تقریباً 16 گرام سونا ضبط کیا گیا تھا۔
یو این آئی
