حیدرآباد: مرکزی الیکشن کمیشن نے تلنگانہ اسمبلی انتخابات کی تشہیری مہم کے آخری دن ریاست کی حکمران جماعت بی آر ایس کے امیدوار کوشک ریڈی کی جانب سے دیئے گئے بیان کا سخت نوٹ لیا ہے۔ انتخابی ادارہ نے حضورآباد کے انتخابی عہدیدار کو ہدایت دی ہے کہ وہ کوشک ریڈی کے ریمارکس کی جانچ کرتے ہوئے رپورٹ پیش کرے جنہوں نے متنازعہ بیان دیتے ہوئے کہا تھا کہ اگر رائے دہندے ان کو منتخب نہیں کریں گے تو وہ اپنے ارکان خاندان کے ساتھ خودکشی کرلیں گے۔
بی آر ایس رہنما نے مزید کہا کہ اگر ان کو منتخب نہیں کیا گیا تو ان کے تین ارکان خاندان بشمول ان کی ارتھی کا جلوس 4 دسمبر کو نکالا جائے گا۔ یہ عوام کے ہاتھ میں ہے کہ وہ ان کے خاندان کو زندہ دیکھنا چاہتے ہیں یا مردہ۔ انہوں نے کملاپور منڈل مستقر میں انتخابی مہم کے دوران یہ متنازعہ ریمارک کیا تھا۔ کوشک ریڈی حضورآباد سے بی آر ایس کے امیدوار ہیں۔ وہ تلنگانہ قانون ساز کونسل کے رکن بھی ہیں تاہم حکمران جماعت نے ان کو اس حلقہ کا امیدوار بنایا ہے۔گذشتہ روز ان کے اس متنازعہ بیان کا سخت نوٹ لیتے ہوئے الیکشن کمیشن نے رپورٹ طلب کی ہے۔
مزید پڑھیں: تلنگانہ اسمبلی انتخابات تشہیر کا اختتام، ووٹنگ 30 نومبر کو
ریاست تلنگانہ میں 30 نومبر کو اسمبلی انتخابات کے لئے ووٹنگ ہوگی۔ تلنگانہ سمیت پانچ ریاستوں کے انتخابات کے نتائج کا اعلان تین دسمبر کو کیا جائے گا۔ اسمبلی انتخابات کے لئے تمام تر تیاریاں مکمل کرلی گئیں ہیں۔
یو این آئی
