سرینگر: وادی کشمیر کے کمسن گلوکار ایان سجاد کا مقبول نغمہ ’گو کیاہ ملال یارس‘ پیر کو سرینگر میں ایف ایم ’ریڈیو مرچی‘ پر نشر کیا گیا۔ انجان کشمیری کے ان اشعار کو ایان سجاد نے اپنی دلکش آواز اور پر کشش لہجہ کے ساتھ گزشتہ دنوں یوٹیوب اور سوشل میڈیا پر ریلیز کیا جو کافی وائرل ہوا اور اس کی کافی پذیرائی ہوئی۔ ایف ایم ریڈیو مرچی نے ایان سجاد کے اس نغمے کو ریڈیو کے ذریعے مزید مقبولیت دینے کے مقصد سے اسے اپنے پلیٹ فارم پر نشر کیا۔
ریڈیو مرچی کی آر جے (ریڈیو جاکی) مہک نے کہا کہ ایان سجاد کے نغموں کو سوشل میڈیا پر پسند کیا جا رہا ہے اور اسی پس منظر میں ہم نے اس کو مزید پذیرائی دینے اور زیادہ لوگوں تک پہنچانے کی کوشش کی۔ ریڈیو مرچی کے پروگرام منیجر یاسر نے ای ٹی وی بھارت کو بتایا کہ ریڈیو مرچی کی یہی کوشش رہی ہے کہ جموں کشمیر کے نوجوان گلوکاروں کو پروموٹ کرے اور کشمیری زبان کو زندہ رکھے۔
مزید پڑھیں: Santoor Artist Of Pulwama ملیے پلوامہ کے سنتور فنکار نصیر احمد میر سے
ایان سجاد کے نغموں کو مشق ٹاکس نامی پروڈکشن ہاؤس پروڈیس اور پروموٹ کر رہا ہے۔ مشق ٹاکس کے ساتھ منسلک آر جے عمر ناصر نے ای ٹی وی بھارت کو بتایا کہ مشق ٹاکس (Mash Talks) کا مقصد یہی ہے کہ کشمیری نغموں اور کشمیری گلوکاروں کو آن لائن پلیٹ فارم کے ذریعے پوری دنیا تک پہنچانا ہے۔ یاد رہے کہ ایان سجاد جنوبی کشمیر کے ضلع اننت ناگ کے رہنے والے ہیں۔ وہ آٹھوں جماعت کے طالب علم ہیں اور گزشتہ ایک برس سے وہ سوشل میڈیا پر اپنے نغموں کی وجہ سے کافی مقبول ہوئے ہیں۔ انہوں نے کشمیری زبان میں ابھی تک چند ہی نغمے گائے ہیں۔ وہ کشمیری شاعری کو جدید موسیقی کا تڑکا دے رہے ہیں جسے کافی پسند کیا جا رہا ہے۔
