سرینگر (جموں و کشمیر): بارہمولہ حلقے کے سابق رکن پارلیمان اور جموں کشمیر کے سینئر سیاستدان مظفر حسین بیگ بدھ کے روز اپنی اہلیہ سفینہ بیگ کے ہمراہ پیپلز ڈیموکریٹک پارٹی (پی ڈی پی) کی سربراہ محبوبہ مفتی سے ان کی رہائش گاہ واقع نوگام میں ملاقی ہوئے۔ یہ پی ڈی پی سے علیحدگی کے بعد انکی محبوبہ مفتی کے ساتھ پہلی غیر رسمی ملاقات تھی، بیگ اس پارٹی کے سابق صدر بھی رہ چکے ہیں۔
جہاں جموں و کشمیر کی سابق وزیر اعلیٰ محبوبہ مفتی نے بیگ اور ان کی اہلیہ کے ساتھ ملاقات کو ’’خیر سگالی‘‘ بتایا وہیں مظفر بیگ کے سابق ساتھیوں کا کہنا ہے کہ ’’بیگ صاحب آئندہ لوک سبھا انتخابات میں حصہ لینے کی خواہش رکھتے ہیں۔‘‘ ای ٹی وی بھارت سے بات کرتے ہوئے بیگ کے ایک قریبی ساتھی نے بتایا کہ مظفر بیگ اب پیپلز کانفرنس کے رکن نہیں ہیں اور اُن کی اہلیہ پارٹی میں ہیں بھی اور نہیں بھی۔ وہ پارٹی کی میٹنگز میں حصہ بھی نہیں لیتی ہیں۔‘‘ اُن کا مزید کہنا تھا کہ ’’بیگ دوبارہ رکن پارلیمان بننے کے خواہش مند ہیں اور اس لیے مقامی پارٹیوں کے اراکین سے مل رہے ہیں۔ مجھے لگتا ہے کہ محبوبہ جی سے بھی اسی حوالے سے ملاقات کی ہوگی۔‘‘ اس حوالے سے جب ای ٹی وی بھارت کے نمائندے نے سفینہ بیگ سے رابطہ کرنے کی کوشش کی تو اُن کا فون لگاتار مصروف آیا۔ واٹساپ پر میسیج کا بھی کوئی جواب نہیں دیا۔
واضح رہے کہ بیگ سپریم کورٹ کے ایک سرکردہ قانون دان ہیں جنہوں نے 1996 سے جموں و کشمیر کی سیاست میں عملی حصہ لیا۔ بیگ نے اپنا سیاسی سفر پیپلز کانفرنس کے بینر تلے شروع کیا تھا اور پھر بعد میں سابق وزیر اعلیٰ مفتی محمد سعید کے ساتھ مل کر جموں و کشمیر پیپلز ڈیموکریٹک پارٹی کی بنیاد رکھی۔ جس کے بعد وہ جموں و کشمیر کے نائب وزیر اعلیٰ بھی رہے۔ یہ بھی مانا جاتا ہے کہ 2015 میں پی ڈی پی اور بی جے پی کی مخلوط سرکار کے قیام میں اُن کا اہم کردار رہا تھا۔
مزید پڑھیں: مظفر بیگ سے رشتے مزید مضبوط ہوئے: سجاد غنی لون
جموں و کشمیر کی آئینی خود مختاری کے 2019 میں خاتمے کے بعد مظفر بیگ نے پی ڈی پی سے علیحدگی اختیار کی۔ وہ وزیر اعظم نریندر مودی کی تعریف و توصیف بھی کرنے لگے۔ بعد میں وہ بھاجپا کی اتحادی پارٹی پیپلز کانفرنس میں شامل ہوئے تاہم ان کی سرگرمیاں محدود رہیں حالانکہ ان کی اہلیہ ڈسٹرکٹ ڈیولپمنٹ کونسل کی سربراہ بننے کے بعد پیپلز کانفرنس میں ہمہ وقتی طور مصروف ہوئیں۔ البتہ حالیہ دنوں میں وہ بھی اس پارٹی سے دور ہی نظر آرہی ہیں۔ مظفر بیگ، جموں و کشمیر میں دفعہ 370 کے خاتمے سے متعلق سپریم کورٹ میں دائر کیس میں بھی بطور وکیل پیش ہوئے۔ اس کیس کا فیصلہ ہو چکا ہے لیکن سپریم کورٹ نے اسے تاحال محفوظ رکھا ہے۔
